تطور مهم في ملف ديون مصر الخارجية.. وتحركات جريئة للتخلص من الكابوس
هو الدين الخارجي لمصر وصل لفين؟ وإزاي البلد هتسدد كل المليارات دي من غير ما يحصل أزمة؟ وهل في أمل أصلًا إن مصر في يوم تتخلص من كابوس الديون، ولا ده حلم بعيد؟
طبقًا لآخر بيانات وزارة التخطيط، الدين الخارجي ارتفع في الربع التاني من 2025 بحوالي 4.5 مليار دولار، عشان يوصل لـ 161.2 مليار دولار، بعد ما كان 156.6 مليار دولار في الربع الأول.
طب هو يعني إيه أصلًا "دين خارجي"؟
الدين الخارجي ببساطة هو الفلوس اللي مصر اقترضتها من برة.. سواء من مؤسسات دولية زي صندوق النقد والبنك الدولي، من حكومات، أو من خلال إصدار سندات دولية.. الفلوس دي بتدخل خزينة الدولة عشان تمول مشروعات أو تسد عجز لكنها مش فلوس مجانية.. دي قروض لازم تتسدد مع فوائدها.
طيب السؤال اللي كل الناس بتسأله: إزاي مصر هتسدد ده كله؟
الرد هنا له كذا زاوية .. اول حاجة إيرادات العملة الصعبة.. مصر بتعتمد على مصادر زي السياحة، قناة السويس، الصادرات، وتحويلات المصريين بالخارج. ودي بتحقق مليارات الدولارات سنويًا.. تاني حاجة إعادة الجدولة وإصدار سندات.. ساعات الحكومة بتعمل اتفاقيات لإعادة جدولة الدين أو بتصدر سندات جديدة تسدد بيها القديمة.
ده بالاضافة كمان للاستثمارات الأجنبية.. كل ما مصر تجذب استثمارات جديدة ده بيزود التدفقات الدولارية، وبالتالي قدرة الدولة على السداد.
ومن الأخبار الإيجابية هنا إن عجز الحساب الجاري تراجع بشكل واضح: نزل 41% في الربع التاني من 2025، بقى 2.19 مليار دولار بدل 3.7 مليار في نفس الربع السنة اللي فاتت.. وعلى مدار السنة المالية كلها، العجز قل حوالي *26%*. وده معناه إن دخلنا الدولاري زاد وصرفنا بالدولار بقى أهدى.
و إمتى مصر ممكن تتخلص من كابوس الديون؟
الحقيقة الخروج من دايرة الدين مش هييجي في يوم وليلة.. ده محتاج خطط طويلة المدى أهمها زيادة الصادرات الصناعية والزراعية.. و كل ما نصدر أكتر، ييجي لنا دولار أكتر وكمان تعميق التصنيع المحلية عشان نقلل الاستيراد اللي بيستهلك عملة صعبة وجذب استثمارات ضخمة زي اللي بيحصل في العاصمة الإدارية، محور قناة السويس، والمناطق الصناعية الجديدة.
الخبراء شايفين إن لو مصر قدرت تحافظ على وتيرة تقليل العجز وتحقيق نمو في الصادرات وتحويلات المصريين، مع زيادة تدفقات الاستثمار، ساعتها الدين ممكن يفضل تحت السيطرة ويتراجع تدريجيًا على المدى المتوسط.
لكن برضه لازم نكون واقعيين.. الدين الخارجي هيفضل موجود فترة طويلة، ومش هيتشال من على كاهل الاقتصاد بسهولة. الفرق الوحيد إننا نعرف نديره صح، بحيث يبقى أداة للنمو مش عبء خانق.
