خطوة جديدة من الحكومة للتخلص من ديون مصر لصندوق النقد الدولي.. شوف ايه اللي بيحصل
شهر سبتمبر الجاري هتكون في حاجة مهمة جدا بخصوص علاقة مصر بصندوق النقد الدولي.. ياتري اية الحاجة دي.. وهل الدولة ممكن تقدم تنازلات وتصلح علاقاتها مع صندوق النقد الدولي.
مصر عندها التزام مهم جدا في الوقت الحالي أنها تتخلص من الديون الخارجية خصوصا الديون الخاصة بصندوق النقد، وخلال شهر سبتمبر الحالي الدولة هتسدد جزء كبير من ديون الصندوق اللي موجودة علي مصر هتوصل قيمتها لـ397 مليون دولار، ومع نهاية 2025 مصر هتسدد 1.07 مليار دولار من الديون وفوائدها للصندوق علي مصر.
شهر سبتمبر الحالي هيكون في حاجة مهمة جدا، وهيا الزيارة المرتقبة لوفد الصندوق اللي هتكون علي مصر لصرف الشريحتين الخامسة والسادسة من قرض الـ8 مليار دولار واللي مصر اخذت موافقه في مارس 2024 وأخذت منه 4 شرائح لحد النهاردة كان أخرهم الشريحة اللي أخذتها مصر في الربع الأول من 2025 واللي وصلت قيمتها لـ1.2 مليار دولار .
طيب مصر هتجيب الفلوس دي كلها منين؟.
ميزانية الدولة للسنة المالية الحالية بتستهدف تحقيق فائض أولي بنسبة 4٪ من الناتج المحلي الإجمالي، وده هدف مهم للدولة علشان تقدر تسد الدين وتقلل الخطر المالي وده واحدة من الأهداف المهمة للحكومة للتخلص من الديون الخارجية، والحكومة حطت خطة مستهدفة للتخلص من ديوننا الخارجية بالكامل خصوصا ديون صندوق النقد الدولي في 2047 وبدون اي جدولة.
صندوق النقد توقع أن نسبة الدين الخارجي للناتج المحلي تنزل من 46٪ في 2025 إلى 34٪ في 2030، ده في حالة لو الحكومة فضلت ماشية في المسار الاقتصادي الحالي، ونفذت خططها لزيادة مورادها الدولارية، وكملت خطط التخارج من الشركات والقطاعات المملوكة للقطاع العام.
في الوقت الحالي في مصادر كتيرة مصر شغالة عليها لزيادة الأيرادات أولها رفع الإيرادات الضريبية، وده بيحصل عن طريق توسيع القاعدة الضريبية وتحسين تحصيل الضرائب تخفيض الإعفاءات وتحديث السياسات الضريبية بهدف جذب مستثمرين جداد للسوق المصري وتحفيز المستثمرين علي الدخول لمنظومة الضرائب.
الدولة كمان عندها هدف كبير واللي له مردود كبير جدا علي الاقتصاد المصري وهو برنامج الطروحات الحكومية واللي حقق حتي الأن اكثر من 6 مليار دولار في الناتج القومي المصري، وقبل نهاية 2025، الدولة هتكون انتهت من طرح عدد كبير من الشركات المملوكة للقطاع العام وشركات الجيش، ده غير أنه هيتم طرح المطارات المصرية لأول مرة في التاريخ والبداية هتكون بمطار الغردقة، وهتوصل عدد المطارات اللي هتدخل برنامج الطروحات لـ11 مطار.
في نقطة كمان مهمة جدا في خطة مصر لتوفير دولار لسداد ديون مصر الخارجية، وهو استمرار خطة الحكومة لترشيد الإنفاق وتقليل الإنفاق غير الضروري، ومنح الأولوية للمشروعات اللي بتدخل عائد اقتصادي واضح، وتأجيل أو إلغاء بعض المشروعات اللي مش عاجلة.
تحسين بيئة الأعمال والاستثمار واحدة من الأهداف المهمة للحكومة الحالية، والحكومة عندها هدف أكبر بتقديم تسهيلات أكثر وتحفيزات للمستثمرين للدخول للسوق المصري وزيادة الصادرات وتحقيق حلم مصر بالوصول لـ140 مليار دولار في 2030 .
