صفر ديون خارجية.. هل مصر على موعد مع نهاية القروض؟
الحكومة خطت خطة واضحة للسيطرة علي الدين العام.. وهيكون في مواعيد ثابتة ومعروفة لسداد ديون مصر الخارجية.. ياترى ايه هيا خطة مصر لسداد ديونها الخارجية.. وامتي مصر هتوصل لصفر ديون خارجية.
مصر واحدة من الدول اللي عندها أعباء اقتصادية كتيرة، واحدة من أهم الأعباء دي هيا الدين الخارجي واللي عبارة عن حمل ثقيل علي ظهر الحكومة خصوصا أنه بياخذ نسبة كبيرة من الناتج القومي المصري، لكن وبعد فترات طويلة الحكومة حطت خطة للتخلص من الحمل التقيل ده، وهيكون عندنا مواعيد محددة لسداد القروض وفوائدها معروفة للكل علشان الدولة تتخلص من أهم أزمة اقتصادية عندها.
طيب إزاي مصر هتسدد ديونها الخارجية وامتي مصر هتوصل لصفر ديون خارجية ؟.
بداية خطة مصر للتخلص من الدين الخارجي هتكون من الديون قصيرة الأجل وتحويلها لاستثمارات منتجة، وحاليا الحكومة شغالة علي إعادة جدولة بعض الالتزامات قصيرة الأجل علشان تكون أقل ضغط لى الموازنة، وحاليا اغلب تركيز الحكومة موجودة علي المشروعات اللي لها عائدات كبيرة علي الاقتصاد المصري ويكون لها عوائد كبيرة تساعد مصر في سداد التزاماتها الخارجية.
في نفس الوقت اللي الدولة مركزة فيه علي القطاعات الاعلي إنتاجية واللي لها عائدات كبيرة علي الاقتصاد المصري، الدولة بتتوسع في إصدار الصكوك والسندات السيادية علشان توفر سيولة ونقدر من خلالها نعيد هيكلة الدين العام وتقليل الاعتماد علي الناتج القومي.
نقطة مهمة كمان في خطة مصر لسداد ديونها الخارجية قائمة علي زيادة الإيرادات المحلية وتحسين الكفاءة الضريبية، وده جزء كبير من الخطة المالية اللي صندوق النقد الدولي بيبص عليها في مراجعته الدورية للحصول علي شرائح قرض ال 8 مليار دولار واللي مصر صرفت منه 4 شرائح حتي الآن، ده غير خفض الإنفاق وترشيد الإنفاق.
في الوقت الحالي الحكومة مركزة جدا علي عدد من القطاعات التصديرية العالية بهدف زيادة الصادرات والايرادات خصوصا من القطاعات المهمة زي قناة السويس والسياحة، ده غير إجراءات جذب الاستثمار الأجنبي المباشر وتحسين مناخ الاستثمار عن طريق زيادة التحفيزات والتسهيلات اللي قدمتها الدولة للمستثمرين والقطاع الخاص.
في مفاوضات مهمة الحكومة بتعملها مع الجهات والمؤسسات اللي لها ديون عندنا لتحويل ديونهم الي استثمارات في السوق المصري خصوصا الصين واللي خلاص بشكل شبه رسمي تم الاتفاق علي تحويل جزء كبير من الديون الصينية الي استثمارات في السوق المصري، وده بيعد سلاح ذو حدين أولهم اننا بتخلص من ديونا الخارجية، ده غير أننا بنحولها لاستثمارات وإنتاج في السوق المحلي.
