مصر تقترب من 50 مليار دولار صادرات.. هدوء في سوق الدهب.. وخبر سعيد من المركزي
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، مصر تقترب من 50 مليار دولار صادرات، وهدوء في سوق الدهب، وخبر سعيد من المركزي.
نبدأ من هيئة الرقابة على الصادرات والواردات المصرية، واللي قال رئيسها المهندس عصام النجار إنه متوقع إن الصادرات المصرية مع نهاية 2025 توصل لمستويات ما بين 48 لـ 50 مليار دولار لأول مرة في تاريخها.
وقال كمان إن إطلاق بعثة المشترين الدوليين HATS 2025 يعتبر فرصة استراتيجية كبيرة علشان يعزز وجود الصناعات الهندسية المصرية على الخريطة العالمية.
وأضاف النجار إن التطور ده بيعكس إن الشركات المصرية بدأت تتوسع في أسواق جديدة، وقدرتها التنافسية بقت أعلى، وده ماشي مع شغل الحكومة الفترة الأخيرة لدعم المصدرين وتسهيل حركة التجارة الخارجية.
وكمل إن القطاع الهندسي عنده إمكانيات ضخمة في التصنيع والتكنولوجيا، وده اللي يخليه قادر ينافس برا بقوة، ومجرد دعم القطاع ده بيساهم بشكل مباشر في زيادة الصادرات وفتح أسواق جديدة قدام الصناعات المصرية.
وقال كمان إن الهيئة مستمرة في متابعة ومساندة الشركات علشان تضمن جودة منتجاتها وسهولة دخولها للأسواق العالمية… وده بيوضح قد إيه القطاع الهندسي بقى واحد من أعمدة الاقتصاد المصري.
ونروح دلوقتي لسوق الصاغة…
أسعار الذهب في مصر النهارده سجلت استقرار واضح مع بداية التعاملات، بعد موجة تراجع بسيطة الأيام اللي فاتت… وسعر جرام الذهب عيار 21 وصل لـ 5455 جنيه.
وبحسب آخر تحديث على منصة آي صاغة، كانت الأسعار كالآتي:
عيار 24: 6234 جنيه
عيار 22: 5714 جنيه
عيار 21: 5455 جنيه
عيار 18: 4675 جنيه
عيار 14: 3636 جنيه
الجنيه الذهب: 43640 جنيه
الأوقية: 4085 دولار
وأكد سعيد إمبابي، المدير التنفيذي لآي صاغة، إن دخول شركات التأمين لسوق الذهب ممكن يزود الطلب الفعلي على المعدن الأصفر، خصوصًا مع إن المعروض محدود والسوق المصري بيعتمد بدرجة كبيرة على الاستيراد.
لكن في نفس الوقت وضح إن الاستثمارات دي غالبًا هتتدار بشكل تدريجي ومنضبط… وده يقلل فرص حدوث نقص في المعروض أو ارتفاعات كبيرة مفاجئة في الأسعار.
واختتم كلامه إن القرار الجديد ممكن يزوّد الطلب، بس من غير ما يعمل أزمة… طالما كل خطوة ماشية تحت رقابة دقيقة وتنفيذ مدروس يحافظ على توازن الأسعار واستقرار السوق.
ونروح لاحتياطي الذهب في البنك المركزي المصري، واللي سجل ارتفاع جديد في أكتوبر 2025… بعد ما زود البنك رصيده بحوالي 780 أونصة، وبقى الإجمالي 4.142 مليون أونصة مقارنة بـ 4.141 مليون أونصة في سبتمبر.
وبيانات البنك المركزي وضحت إنه اشترى حوالي 62.96 ألف أونصة خلال أول 10 شهور من السنة.
وعلى مستوى القيمة… رصيد الذهب زاد بنحو 702 مليون دولار في أكتوبر، عشان يوصل لـ 16.545 مليار دولار مقابل 15.843 مليار في سبتمبر.
وفي سياق مرتبط… مجلس الذهب العالمي أعلن إن البنك المركزي المصري احتل المركز السابع عشر عالميًا ضمن أكتر البنوك المركزية شراءً للذهب في أول تسع شهور من 2025.
ونختم بتصريحات مهمة للدكتور شريف فاروق، وزير التموين والتجارة الداخلية… اللي أكد إن الاحتياطي الاستراتيجي من السلع الأساسية آمن ومطمئن، وإن كميات السلع الموجودة أعلى من نفس الفترة السنة اللي فاتت، وده بيعكس قوة منظومة الإمداد واستمرار شغل الدولة على تأمين الغذاء.
وأوضح كمان إن احتياطي القمح يكفي فترات آمنة… وإن انخفاض الواردات السنة دي يعتبر مؤشر إيجابي على زيادة الاعتماد على القمح المحلي.
وسجل موسم توريد القمح السنة اللي فاتت طفرة كبيرة… الكميات زادت حوالي 17% ووصل التوريد لأكتر من 4 ملايين طن.
وده دليل على ثقة أكبر من المزارعين في المنظومة، ونجاح سياسات الدولة التحفيزية… خصوصًا مع خطة الوصول لـ 5 ملايين طن الموسم الجاي، تنفيذًا لتوجيهات الدولة لتحقيق أكبر قدر من الاكتفاء الذاتي.
وقال الدكتور شريف فاروق كمان إن احتياطيات الزيت والسكر مستقرة بوضوح، وفيه كميات تكفي لفترات طويلة… وكمان مخزون اللحوم والدواجن في المجمعات والشركات التابعة للدولة كافي ومغطي احتياجات المواطنين من غير أي نقص.
