صادرات مصر السلعية تقترب من 50 مليار دولار في 2025 للمرة الأولى
الصادرات المصرية ماشية بسرعة غير مسبوقة، وكأنها بتجري علشان توصل البلد لعلامة تاريخية: 50 مليار دولار في سنة واحدة! الوتيرة عالية، القطاعات بتكبر، والأسواق بتتفتح، و2025 شكله هيبقى العام اللي مصر فيه بتغير شكل خريطتها التجارية، وده كله جزء من خطة أكبر، خطة هدفها إن مصر تبقى قوة تصديرية حقيقية قبل 2030.
خلّيني أخدك في جولة سريعة عن اللي بيحصل.. الصادرات المصرية في 2025 عاملة طفرة بمعنى الكلمة، خلال أول 9 شهور بس، مصر صدرت سلع غير بترولية بقيمة 36.6 مليار دولار وده بمعدل نمو يوصل لـ 21% عن نفس الفترة السنة اللي فاتت. يعني مش مجرد زيادة بسيطة، لأ طفرة فعلا.
اللي حصل ده انعكس فورًا على الميزان التجاري، العجز التجاري نزل 18%، وده أول مؤشر يقول إن حركة الإنتاج والتصدير شغالة كويس، وإن البلد بقت توفر جزء كبير من احتياجاتها من غير استيراد زائد يعني أقل واردات غير ضرورية وأكتر صادرات داخلة خزنة الدولة.
طيب تفتكر مين أكتر دول بتستورد مننا؟
هقولك .. الإمارات لسه رقم واحد، شارية من مصر بأكتر من 5.9 مليار دولار، بعدها تركيا، والسعودية، وبعدين إيطاليا وأمريكا، وده معناه إن مصر مش بس بتصدر للعرب لأ، ماشية في أسواق عالمية كبيرة كمان.
نيجي بقى للقطاعات .. اللي عامل مفاجأة السنة دي هو قطاع مواد البناء، القطاع ده لوحده صدر بـ 11.6 مليار دولار .. زيادة 51%! والسر هنا في الطلب الكبير على الحديد، والدهب، والأسمنت المصري.
بعده بييجي قطاع الكيماويات والأسمدة بقيمة أكتر من 6.8 مليار دولار، وده طبيعي مع توسع المصانع الجديدة وشغل التصدير لمناطق أفريقيا وآسيا.
الصناعات الغذائية كمان عاملة شغل جامد أكتر من 5.1 مليار دولار، والمبهج إن قطاع الهندسية والإلكترونيات دخل بقوة، 4.7 مليار دولار بعد ما شركات عالمية بدأت توسع خطوط إنتاجها جوه مصر بس للتصدير
غير كده عندك الزراعي، الملابس الجاهزة، والصناعات الطبية، كلهم طالعين لفوق وبنسب نمو محترمة جدا.
طيب هل نقدر نوصل لـ 50 مليار دولار بنهاية السنة؟
البيانات بتقول إن المتوسط الشهري للصادرات قرب من 4 مليارات دولار .. ولو الأداء كمل بالشكل ده، خصوصًا في الربع الأخير، الرقم ده مش بعيد خالص بالعكس، ده في المتناول، ويمكن نتخطاه كمان.
لكن القصة مش 2025 بس .. الحكومة عاملة خطة إنها توصل الصادرات لـ 145 مليار دولار في 2030، رقم كبير؟ آه، صعب؟ ممكن، مستحيل؟ لأ .. بس محتاج شغل تقيل: تطوير مصانع، توسيع خطوط الإنتاج، أسواق جديدة، وموانئ وسلاسل لوجستيات أقوى.
وكل ده مهم لأن الهدف إن مصر تتحول من “اقتصاد بيستهلك” لـ “اقتصاد بينتج وبيصدر” .. وده بيدي البلد قوة حقيقية، عملة صعبة، وفرص شغل، ومكانة اقتصادية ثابتة في المنطقة.
وفي النهاية لو مصر كملت باقي الشهرين دول على نفس الوتيرة، فـ 2025 هيبقى فعلاً سنة فاصلة .. السنة اللي فيها الدولة ترجع لموقعها الطبيعي: مركز إنتاج وتصدير في الشرق الأوسط وأفريقيا، ومحطة مهمة في سلاسل التجارة العالمية.. السنة اللي ممكن نقول عليها 2025 سنة انطلاق مصر للصادرات!
