25 ألف شقة جاهزين للحجز.. والموضوع كله أونلاين
دلوقتي عندك فرصة ذهبية لحد 15 ديسمبر 2025.. وزارة الإسكان أعلنت فتح الحجز للطرح التاني بـ 25 ألف شقة جديدة، والمرة دي مفيش ورق ولا مشاوير.. كله من خلال منصة مصر العقارية اللي بقت المنصة الرسمية لأي مشروع سكني في البلد.
المنصة بتعرضلك كل حاجة قدامك بوضوح: المساحات .. الأسعار .. أماكن الوحدات .. وأنظمة السداد.. يعني مش هتحتاج تسأل حد، كل التفاصيل موجودة.
الشقق موجودة في أكتر من مشروع وفي مدن جديدة مختلفة، وكل وحدة ليها مواصفات وسعر يناسب كل الفئات.
بس أهم حاجة قبل ما تقدم تراجع الشروط الأساسية:
لازم تكون مصري
سنك فوق 21 سنة
وما ينفعش أنت وأسرتك تقدموا على أكتر من وحدة في نفس المشروع.
وكراسة الشروط تعتبر جزء من عقد البيع ومبلغ الجدية معناها إنك وافقت خلاص.
وبالنسبة لخطوات التقديم .. ولا أسهل
هتسجل حساب على منصة مصر العقارية
وتدخل على صفحة الطرح الجديد تملى بياناتك، تختار الشقة اللي تناسبك، وتدفع مبلغ الجدية أونلاين.
وفي ثواني هيظهرلك إيصال تأكيد تقدر تتابع بيه طلبك من غير ما تتحرك خطوة من بيتك .. لا طوابير ولا مكاتب ولا انتظار.
يعني اللي كان زمان بياخد شهور .. بقى يتم في دقائق والـ 25 ألف شقة مستنيين اللي يلحق ويحجز!
