هل يفاجئ الاحتياطي الفيدرالي الأمريكي الأسواق بقرار غير متوقع؟
يا ترى ممكن الفيدرالي يِفاجئ العالم بقرار مش متوقع؟ ولو حصل إيه اللي ممكن يحصل للدهب، للدولار، لأسواق الأسهم، وحتى لأسعار السلع عندنا في مصر؟ وليه بالذات اجتماع الأربعاء 29 أكتوبر كل المتداولين والمستثمرين ومحللين العالم مترقبين اللى هيحصل فيه؟
العالم كله دلوقتي مستني قرار الفيدرالي الأمريكي في نهاية اجتماع لجنة السوق المفتوحة… التوقع اللي بقى شبه مؤكد وسط الاقتصاديين والمستثمرين هو خــفــض الفائدة 25 نقطة أساس عشان يوصل النطاق لـ3.75% – 4.0%.. وده ضمن خطة التيسير النقدي اللي الفيدرالي ماشي فيها بقاله شهور لدعم النمو الاقتصادي في ظل التضخم اللي لسه عالي.
لحد هنا… مافيش مفاجأة. طب ليه الأسواق متوترة؟ لأن “القرار” مش هو الحدث" “الكلام بعد القرار” هو الحدث.. العالم مش مستني الأرقام العالم مستني كلام جيروم باول.. المؤتمر الصحفي لجيروم باول بعد القرار هو اللى هيحرّك الشاشات.
الناس مستنية منه حاجة من اتنين يا إمّا إعلان رسمي عن “وقف” برنامج تقليص الميزانية اللي هو التشديد الكمي يا إمّا تلميحات قوية جدًا إنه قرب ينتهي.
وقف التشديد الكمي هيساوي سيولة هترجع للسوق وأسهم ممكن تطير ودهب أسعره هتنزل ..لكن لو باول مشى بالعكس وقال لسه التشديد مكمل هنا كل المعادلة تتشقلب.
اللي عامل لغز حقيقي قدام الفيدرالي إن في “إغلاق حكومي” لأسابيع، وده وقف إصدار بيانات اقتصادية مهمة مافيش أرقام رسمية يمشوا عليها فبقوا يعتمدوا مؤقتًا على بيانات القطاع الخاص في حاجات زي ثقة المستهلك و مؤشرات أسعار المنازل ومسوحات النشاط.. يعني الفيدرالي بياخد قرار فاقد لنص أدواته وده يخلي احتمال المفاجأة موجود.
طب ليه الكلام ده يخصّك وإنت في مصر؟
لأن أي تغيير في مسار الفيدرالي معناه تغيير في اتجاه الدولار عالميًا وكمان تغيير في تدفقات الأموال للأسواق الناشئة و تغيير في شهية المخاطر وتغيير في أسعار النفط والدهب وبالتالي أسعارنا المحلية.. ولو الفيدرالي فاجئ بلهجة مش متوقعة الدهب والدولار عند الصاغة ممكن يتغيّروا في 48 ساعة.. ولما الدولار العالمي يقوى أو يضعف وارد جدًا تتأثر تسعيرة الاستيراد عندنا واللي ينعكس بعدها على الأسعار
يمكن القرار المتوقع معروف…لكن التأثير مش في الرقم للى هيتم الاعلان عنه التأثير في اللهجة بعد الرقم .. لو باول أعلن وقف التشديد الكمي الأسواق ممكن تحتفل.. لو شدد نبرته الأسواق ممكن تتقلب حرفيا.
