ازاي بيتم اختراق حسابك البنكي وإنت مش واخد بالك.. حركة واحدة تسحب فلوسك
تخيل حد يدخل حسابك البنكي، من غير ما يعرف رقمك السري، ومن غير ما يسرق موبايلك، كل اللي عمله إنك إنت إدّيته المفتاح بإيدك.
إزاي ده بيحصل؟ خليني أقولك الحقيقة، أغلب الاختراقات البنكية مش بتبدأ بهكر معقد.. بتبدأ برسالة.
رسالة تقولك: في مشكلة في حسابك، أو عملية مرفوضة، اضغط هنا، أو تم إيقاف بطاقتك.
تدوس على اللينك، تدخل بياناتك، تكتب رقم البطاقة، الرقم السري، الـ OTP اللي جه على موبايلك، وفجأة الحساب بقى مش بتاعك.
ده اسمه تصيد احتيالي، بيخلوك تثق فيهم عشان تفتح لهم الباب بنفسك.
طريقة تانية أخطر شوية تطبيق شكله عادي، لعبة زي برنامج تعديل صور، تحمله وتوافق على الصلاحيات
ومن غير ما تحس، التطبيق بقى شايف كل حاجة بتكتبها، ومنها بيانات البنك.
وفي غلطة ناس كتير بتقع فيها، الواي فاي المفتوح شبكة مجانية في كافيه أو مول تدخل منها على حسابك البنكي وتفتكر إن الموضوع عادي، بس الحقيقة إن الشبكات دي أحيانًا بتبقى سهل اختراقها.. طيب تحمي نفسك إزاي؟
أول قاعدة: عمرك ما تدي الرقم السري أو الـ OTP لأي حد، البنك مستحيل يطلبهم منك.
تاني قاعدة: ما تضغطش على أي لينك مش متأكد منه 100%، ادخل على تطبيق البنك الرسمي بنفسك.
تالت حاجة: استخدم كلمة سر قوية ومختلفة لكل حساب، وشغّل التحقق بخطوتين لو متاح.
وأخيرًا، راجع حسابك باستمرار، أي حركة مش مفهومة؟ بلّغ فورًا.
البنوك عندها أنظمة حماية قوية جدًا،وتشفير، ومراقبة لحظية لأي نشاط غريب.
بس مهما كان النظام قوي، لو إنت سلّمت البيانات بنفسك، ولا نظام هيعرف ينقذك.
الهاكر مش دايمًا بيكسر النظام، أوقات كتير بيستغل لحظة استعجال منك.
