قفزة بـ2 مليار جنيه.. "حديد المصريين" تستهدف رفع كفاءة خطوط الإنتاج
في وقت الصناعة المصرية بتشهد فيه منافسة كبيرة وتطور مستمر، شركة حديد المصريين بتبدأ مرحلة جديدة من التوسع والتطوير، بخطة استثمارية ضخمة قيمتها حوالي 2 مليار جنيه.. والهدف منها مش بس زيادة الإنتاج، لكن كمان رفع جودة المنتج، ودعم التصدير، وتقوية مكانة الحديد المصري في الأسواق العالمية.
شركة حديد المصريين بتجهز لخطة استثمارية قوية تبدأ من أول سنة 2026، مدتها 18 شهر، وميزانيتها تقارب الـ 2 مليار جنيه
الخطة دي جزء من رؤية الشركة علشان ترفع كفاءة خطوط الإنتاج، وتوسع وجودها في السوق المحلي والعالمي، التمويل هيكون مناصفة بين موارد الشركة نفسها والتمويل البنكي، علشان تقدر تشتغل على أكتر من محور في وقت واحد.
ومن أبرز المشروعات اللي الشركة ناوية تنفذها، إنشاء مصنع جديد لإنتاج "الجير"، وده عنصر أساسي في صناعة الحديد والصلب، والجير بيتستخدم في عملية الصهر داخل الأفران علشان يشيل الشوائب من الحديد المنصهر، وده بيساعد في تحسين جودة المنتج النهائي .. ده غير ان المصنع الجديد هيخدم احتياجات مصانع الشركة، وكمان هيتم بيع الفائض للسوق المحلي.
الخطة كمان بتشمل تطوير الماكينات وخطوط الإنتاج في مصانع بورسعيد والإسكندرية، علشان تشتغل بكفاءة أعلى وتنتج كميات أكبر بأقل تكلفة وأفضل جودة.
وخليتي اقولك ان حديد المصريين عندها دلوقتي أربع مصانع رئيسية بطاقة إجمالية بتقارب 2.3 مليون طن سنوياً، موزعة بين بني سويف، العين السخنة، وبورسعيد .. ومع التطوير الجديد، الشركة بتستهدف توصل بإنتاجها لـ 1.7 مليون طن سنة 2026 بدل 1.2 مليون طن بس في نهاية 2025.
وده مش كل حاجة، الشركة عندها هدف تاني مهم، وهو زيادة الصادرات، حالياً الصادرات بتمثل حوالي 7% من الإنتاج، لكن في الخطة الجديدة النسبة دي هتزيد لـ 30% خلال سنتين، علشان الحديد المصري يوصل لأسواق أوروبا وأفريقيا بشكل أوسع.
الشركة كمان بتركز على تحسين الأداء البيئي وتقليل الانبعاثات الكربونية، وده جزء من التزامها بالتوافق مع المعايير الأوروبية الجديدة اللي بتهتم بالاستدامة وحماية البيئة.
والتحركات دي بتأكد إن حديد المصريين مش ماشية بخطوات تقليدية، لكن بخطة طموحة مدروسة هدفها رفع تنافسية الصناعة المصرية، وتشجيع التصدير، وتحقيق أقصى استفادة من الموارد المحلية.
في النهاية، 2 مليار جنيه مش مجرد رقم كبير، دي خطوة جديدة في طريق طويل لتحديث صناعة الحديد في مصر، وتحويلها لقطاع قوي يقدر ينافس بقوة في المنطقة والعالم.
