كيف تخطط مصر للوصول إلى مليون طن من اللحوم الحمراء سنويا؟.. السر في التجربة الأيرلندية
في الوقت اللي أسعار اللحمة مولعة والناس بقت تقلل في استهلاكها، الحكومة المصرية شغالة بخطة كبيرة عشان تزود إنتاج اللحوم الحمراء محليًا، وتقلل الاستيراد اللي بقى عبء كبير على الدولة.
والهدف ان مصر توصل لإنتاج مليون طن لحمة في السنة بدل ما إحنا دلوقتي بننتج حوالي 550 ألف طن بس
واللي لفت النظر إن مصر بدأت تستفيد من تجربة بلد بعيدة شوية عننا .. إيرلندا!
طب إيه علاقة إيرلندا بالموضوع؟ وليه الحكومة المصرية مهتمة بالتجربة الأيرلندية في الثروة الحيوانية؟
تعالوا نحكي القصة من الأول.
مؤخرًا، وزير الزراعة المصري علاء فاروق قابل وزير الدولة الأيرلندي للشئون الزراعية والغذاء نويل جريلش، والاتنين اتكلموا عن شراكة جديدة بين البلدين في مجال الزراعة والإنتاج الحيواني.
الموضوع مش مجرد كلام بروتوكولي، لأ، ده في خطة حقيقية للاستفادة من الخبرة الأيرلندية في تحسين سلالات الماشية، وزيادة الإنتاج، وكمان إدخال التحول الرقمي في القطاع الزراعي.
إيرلندا واحدة من أنجح الدول في إدارة قطاع الثروة الحيوانية، خصوصًا في مجال الألبان واللحوم، وعندهم أنظمة دقيقة بتستخدم التكنولوجيا لمتابعة كل بقرة من يوم ما تتولد لحد ما تبقى جاهزة للإنتاج أو البيع.
الفكرة إن مصر عايزة تطبق النظام ده، عشان تزود الكفاءة وتقلل الفاقد، وتخلي المزارع الصغيرة تشتغل بشكل حديث ومنتج أكتر.
كمان الوزير المصري أكد إن الدولة بتمشي بتوجيهات من القيادة السياسية لتعظيم الاستفادة من التجارب العالمية الناجحة، وتركز على دعم صغار المزارعين، لأنهم العمود الفقري لأي تنمية زراعية حقيقية.
الخطة كمان فيها بند مهم جدًا: القروض الميسّرة للمزارعين الصغيرين، عشان يقدروا يطوروا مشاريعهم بدل ما يفضلوا يشتغلوا بالإمكانيات القديمة.
والوزير الأيرلندي من ناحيته أشاد بالتطور اللي حصل في الزراعة المصرية، وقال إن بلده شايفة مصر شريك استراتيجي مهم في الأمن الغذائي الإقليمي.
واتكلم كمان عن رغبتهم في تبادل الخبرات في مجال الرقمنة الزراعية، واستخدام التكنولوجيا الحديثة في المزارع، والاستفادة من تجربة مصر في مشروعات الري الحديث والتوسع في الأراضي الجديدة.
الاتنين اتفقوا كمان على تعزيز التبادل التجاري بين البلدين في منتجات زي الألبان، اللحوم، الأعلاف، والتقاوي، وكمان فتح الأسواق الأيرلندية قدام المنتجات المصرية لو اتطابقت مع المعايير الأوروبية.
وفي المستقبل القريب، في نية لعمل برامج تدريب وتبادل خبرات بين الباحثين المصريين والأيرلنديين، بالإضافة لمشروعات في الزراعة المستدامة، والطاقة النظيفة، وحتى الزراعة على أسطح المباني!
وفي النهاية، الهدف الكبير واضح: مصر عايزة تعتمد على نفسها في إنتاج اللحمة، وتقلل الاستيراد، وتعمل نظام حديث ومتطور في تربية الماشية زي النموذج الأيرلندي، عشان نوصل في يوم من الأيام لمليون طن لحمة مصرية 100%.
