انخفاض مشتريات المصريين من الذهب.. وقفزة في قيمة التجارة بين مصر وأهم دول شرق آسيا
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، توقف مؤقت للخدمات المصرفية، وانخفاض مشتريات المصريين من الدهب، وقفزة في قيمة التجارة بين مصر وأهم دول شرق آسيا.
ونبدأ بخبر مهم.. شوية بنوك شغالة في السوق المصري أعلنوا إنهم هيعملوا تحديثات دورية على أنظمتهم التقنية، وده هيكون في نفس وقت انتهاء التوقيت الصيفي وبدء التوقيت الشتوي في البلد.
البنوك قالت في رسايل لعملائها إن التحديثات دي ممكن تأثر مؤقتًا على شوية خدمات زي الإنترنت البنكي أو تطبيق الموبايل، بس لفترة بسيطة مش هتزيد عن نص ساعة.
كمان أوضحوا إن التحديثات هتبدأ ليلة النهارده، من الساعة 11:45 بالليل (بتوقيت الصيف)، وهتنتهي فجر الجمعة 31 أكتوبر، الساعة 12:15 بعد نص الليل (بتوقيت الشتاء).
وشددت البنوك على العملاء إنهم لازم يتأكدوا إن أجهزتهم متظبطة على التوقيت الشتوي الجديد (يعني يأخروا الساعة 60 دقيقة) قبل ما يعملوا أي عملية بنكية، علشان العمليات تمشي بسلاسة بعد التحديثات.
والتحديث ده بييجي علشان يضمنوا أعلى كفاءة وأمان في المعاملات البنكية بعد تغيير الساعة.
نروح بقى لمجلس الذهب العالمي، اللي أعلن النهارده عن حجم مشتريات المصريين من الذهب في الربع التالت من سنة 2025، واللي وصلت لـ 9.9 طن ذهب، يعني أقل بنسبة 14% عن الربع التاني اللي كان فيه المشتريات 11.5 طن.
وبرضو المشتريات في الربع التالت من 2025 أقل من نفس الفترة السنة اللي فاتت 2024 بنسبة 5%.
أما المشغولات الذهبية، فالمصريين اشتَروا منها 4.4 طن في الربع التالت من السنة دي، وده أقل بنسبة 15% عن الربع التالت من 2024 اللي كان 5.1 طن، وأقل كمان من الربع التاني من 2025 اللي كان 5.7 طن.
أما السبائك والعملات الذهبية، فالمشتريات وصلت لـ 5.6 طن في الربع التالت من 2025، بزيادة 5% عن نفس الربع السنة اللي فاتت اللي كان 5.3 طن، لكن أقل من الربع التاني اللي كان 5.9 طن، حسب بيانات منصة جولد بيليون نقلًا عن مجلس الذهب العالمي.
ونروح بقى للجهاز المركزي للتعبئة العامة والإحصاء، اللي كشف إن حجم التجارة بين مصر وأهم دول شرق آسيا وصل لـ 28 مليار دولار في 2024.
الكلام ده جه في النشرة السنوية اللي أصدرها الجهاز بعنوان “التبادل التجاري بين مصر وأهم دول شرق آسيا” لسنة 2024، واللي بتتكلم عن حجم الصادرات والواردات مع أهم دول شرق آسيا زي: ماليزيا، الصين، الهند، فيتنام، اليابان، إندونيسيا، باكستان، تايلاند، كوريا الجنوبية، هونج كونج، وبنجلاديش.
وبيّن التقرير إن إجمالي الصادرات لدول شرق آسيا نزل لـ 1.7 مليار دولار في 2024 بدل 3.7 مليار في 2023، يعني انخفاض بنسبة 53.4%.
وجت المنتجات الحيوانية والنباتات والمشروبات والتبغ في المرتبة الأولى من الصادرات المصرية لدول شرق آسيا بقيمة 400 مليون دولار في 2024 مقابل 600 مليون في 2023، بانخفاض 21.8%.
ونختم بخبر من وزارة الإسكان، واللي أعلن فيه المهندس شريف الشربيني، وزير الإسكان والمرافق والمجتمعات العمرانية، عن تسليم قطع أراضي مشروع "بيت الوطن" للمصريين في الخارج، في الحي التالت وحي شمال الرحاب بمدينة القاهرة الجديدة، وده هيبدأ من يوم الأحد الجاي 2 نوفمبر 2025، لحد 5 فبراير 2026، حسب الجدول المعلن.
وأكد الشربيني إن الوزارة مكملة في تنفيذ توجيهات القيادة السياسية بزيادة الترابط مع المصريين في الخارج، من خلال توفير أراضي سكنية علشان يقدروا يبنوا بيوتهم بنفسهم حسب الاشتراطات، وكمان توفير سكن لائق للمواطنين داخل مصر في المدن الجديدة بمعايير جودة عالية، وده كله في إطار دعم خطة الدولة للتنمية العمرانية وتحقيق رؤية الجمهورية الجديدة.
