مصر تبدأ تشغيل أول وحدة تغييز ثابتة في أغسطس 2027.. وداعا لحر الصيف وقطع النور
مصر داخلة بكل قوتها في عام 2027، وده عشان توفر احتياجات الغاز بشكل كامل.. بس يعني إيه "وحدة تغييز ثابتة"؟ وإيه الفرق بينها وبين السفن العايمة؟، هل المشروع ده فعلاً هينهي أزمة قطع النور في الصيف؟.. وإزاي مصر هتوفر مئات الملايين من الدولارات بالوحدة دي؟.. وليه الحكومة اختارت مصنع إدكو بالذات لتشغيل أول وحدة تغييز؟
مصر بتجهز نفسها من دلوقتي لمستقبل طاقة آمن ومستقر، والموضوع المرة دي مختلف تمامًا، الحكومة أعلنت إن في أغسطس 2027 هتبدأ تشغيل أول وحدة تغييز ثابتة للغاز الطبيعي في مصر، واللي هتكون موجودة في مصنع إدكو بمحافظة البحيرة.. المشروع ده تكلفته حوالي 200 مليون دولار، وبيعتبر الأول من نوعه عندنا.
طب يعني إيه وحدة تغييز؟، الغاز الطبيعي المستورد بييجي في صورة سائلة عند درجات حرارة منخفضة جدًا، الوحدة دي هتحول الغاز من حالته السائلة لحالته الطبيعية كغاز، وبعد كده يدخل على طول في الشبكة القومية عشان يروح لمحطات الكهرباء وبيوت الناس، والنتيجة هتكون واضحة، وهي أمان في الصيف، وهنودع بيها أزمات قطع النور بسبب نقص الوقود.
مصنع إدكو ده في الأساس اتبنى من سنة 2005 عشان يسيل الغاز المصري ويتصدر بره، لكن اتوقف من فترة بسبب نقص الكميات.. ودلوقتي الحكومة قررت تستغله في الاتجاه العكسي، عشان يستقبل الغاز المستورد ويغيزه للسوق المحلي.
المشروع بيتعمل بشراكة بين الحكومة وشركتي شل وبتروناس، لأن الشركتين دول واخدين حق تشغيل المصنع من 2005 والعقد بتاعهم هينتهي في 2029، لحد ما العقد يخلص، مصر هتديهم رسوم استغلال لمدة سنتين، وبعدها الوحدة والمصنع هيرجعوا بالكامل للدولة.
أهمية المشروع ده كبيرة جدًا، لأن مصر حاليًا معتمدة على 4 وحدات تغييز عايمة يعني سفن واقفة في المواني.. 3 سفن في العين السخنة بطاقة إجمالية حوالي 2.25 مليار قدم مكعب يوميًا، وفيه سفينة “إنرجوس وينتر” في دمياط بطاقة 450 مليون قدم مكعب يوميًا، وكمان وحدة في العقبة بطاقة 300 مليون قدم مكعب يوميًا.. المشكلة أن السفن دي بتكلف الدولة مبالغ ضخمة جدًا في الإيجار، وبتتخطى 200 مليون دولار كل سنة، والمبلغ ده كله بيتدفع بالعملة الصعبة.
عشان كده إنشاء وحدة تغييز ثابتة في إدكو هيبقى خطوة استراتيجية ضخمة، مش بس هتوفر مليارات على المدى الطويل، لكن كمان هتكون أمان لمصر في ملف الطاقة.. احنا كده هنمتلك مشروع ثابت مش مربوط بعقود إيجار أو ظروف خارجية.
كمان مصنع إدكو فيه ميزة مهمة جدًا، عنده خزانين كبار لتخزين الغاز المسال، سعة كل خزان حوالي 140 ألف متر مكعب، وده معناه مرونة ضخمة سواء لتخزين شحنات التصدير أو استقبال الغاز المستورد.
يعني باختصار، إن من 2027 مصر داخلة على مشروع ضخم هيأمن احتياجاتنا من الغاز الطبيعي، ويوفر العملة الصعبة اللي كنا بندفعها في إيجار سفن التغييز، ويضمن استقرار الطاقة، وده معناه الكهربا هتبقى منتظمة وهنودع كلنا حر الصيف وقطع النور.
