مصدر جديد للدولار.. كهرباء من الهواء والشمس هتصدرها مصر إلي أوروبا
خلال وقت قريب قوي مصر هتتكم في كهرباء أوروبا بالكامل، وكل الدول هتتمني رضاء مصر علشان توصل لها كهرباء.. ياتري اية حكاية الموضوع ده.. وهل هيجي اليوم اللي نشوف فيه مصر بتتحكم في قارة أوروبا بالكامل.
في الوقت الحالي الحكومة بتعمل مشروعات هدفها تحويل مصر لمركز اقليمي في ملفات كتيرة جدا، واحدة من الملفات دي هو ملف الطاقة، ومصر حاليا عندها استراتيجية لتحويل مصر إلي مركز اقليمي لتبادل الطاقة، وحاليا في شراكات كتيرة بتقوم بيها الدولة للتعاون مع القطاع الخاص للتوسع في محطات ومشروعات الطاقة المتجددة.
في نفس الوقت اللي الدولة بتتوسع في مشروعات الطاقة المتجددة، الدولة عملت اتفاقيات مع عدد من دول العالم للربط معاهم بخطوط ربط كهربائي واحدة من الدول اللي الدولة مركزة في مشروعات الربط معاهم هيا اليونان وقبرص واللي هيكون الخطوة الأولي لمصر للتحكم في كهرباء قارة اوروبا بالكامل.
مصر واحدة من الدول اللي ربنا عطاها إمكانيات كبيرة في الطاقة المتجددة واللي مصدرها الاساسي هيا طاقتي الشمس والرياح، خصوصا في المناطق الصحراوية وعلى ساحل البحر الأحمر، وده اللي الحكومة بتتشغل عليها حاليا في مشروعات بدأت في التشغيل علي الشبكة الموحدة للكهرباء، وفي مشروعات تانية هتدخل علي شبكة الإنتاج خلال وقت قريب قوي.
الكهرباء اللي هتنتجها محطات توليد الطاقة المتجددة هتمكن مصر من حلمها بالتحكم في كهرباء العالم كله، واللي هيكون منها خطي كهرباء قبرص، وده هيكون عبارة عن مشروع كابل بحري هيمر من البحر المتوسط بقدرات متوقعة في البداية 2000 ميجاوات وبطول هيوصل لـ1 و 396 متر.، وهيبدأ يدخل حجز التنفيذ في 2029.
أما عن الخط التاني واللي هيكون بين مصر واليونان، واللي هيكون بقدرة 3 الاف ميجاوات وهيكون باحمالي طول 950 كيلومتر تقريبا، وهتوصل التكلفة التقديرية بتاعته لـ 4.2 مليار يورو، وهيكون الاعتماد الأكبر عن الخطوط اللي من الأنواع دي علي الكهرباء اللي بتكون انتاجها من مشاريع الطاقة المتجددة.
خطي الكهرباء اللي مصر بصدد تنفيذهم مع قبرص واليونان هيكونوا لهم فوائد كتيرة ده علي الاقتصاد المصري، أولها أن مصر هتفتح باب جديد للدولار من صادرات الكهرباء لدولتين في قارة كبيرة وفي حاجة مستمرة للكهرباء زي قارة أوروبا واللي عندها انخفاض كبير في درجات الحرارة وبالتالي حاجتها للكهرباء بترتفع مع الوقت لتوفير التدفئة للمواطنين، ده غير أن عندها قطاع صناعي كبير جدا وفي حاجة مستمرة للكهرباء.
تاني هدف هيرجع علي مصر ان النوع ده من المشروعات بيفتح باب جديد للدولة قدام شركات القطاع الخاص للدخول للسوق المصري والتوسع في بناء محطات توليد الكهرباء من الهواء والشمس، وبالتالي هيزود إنتاج مصر من التيار، وهتقرب مصر من تحقيق حلمها للتحويل إلي مركز اقليمي للطاقة، والخطوط اللي من النوعية دي بتكون بداية لسيطرة كبيرة بتستهدفها مصر علي سوق الطاقة العالمي.
