هل تكون مبادلة الديون وسيلة فعالة لزيادة التمويل التنموي وجذب الاستثمارات الأجنبية لمصر؟
هل فعلا مبادلة الديون ممكن تبقى المنقذ اللي يساعد مصر تقلل ديونها وفى نفس الوقت تجيب استثمارات أجنبية جديدة، طب ايع حكاية الاتفاقيات اللي مصر بدأت توقعها مع الصين ودول تانية، ووإزاي الموضوع ده ممكن ينعكس على الجنيه والاقتصاد؟
حاليا، الحكومة المصرية بتفكر تعمل مبادلة الديون مع دول مهمة، وي بتعتبر وسيلة استراتيجية عشان تعزز كفاءة الاقتصاد المصري.
طب يا ترى الحكومة بتعمل كده لبه؟
بص يا سيدي، اول هدف من أهداف المبادرة دي، هو أنه بتقلل من عبء الدين الخارجي على مصر، وكمان بتفتح باب لتمويل مشاريع تنموية جديدة.
كل ده، غير انها بتساعد في الحفاظ على الاحتياطي النقدي، وده بيأثر على استقرار سعر صرف الجنيه قدام الدولار، يعني بالمختصر، بدل ما مصر تفضل تسدد ديون نقدا أو بالفلوس، بتتفق مع الدولة الدائنة إنها تستثمر نفس الفلوس في مشاريع تنمية داخل مصر. وده مش بس بيخفف الدين، لكن كمان بيزود الاستثمارات الأجنبية المباشرة.
ونقدر نقول، إن المبادرة دي بتخدم "التحول الأخضر" و"التنمية المستدامة"، واللي هما من أولويات الحكومة المصرية الفترة دي، يعني مش أي مشاريع وخلاص،لأ دي مشاريع ليها هدف بيئي أو تنموي واضح.
كمان، في اتفاقيات مبادلة اتوقعت مع دول صديقة ب من 900 مليون دولار، وده رقم محترم جدا، وكمان أرقام البنك المركزي بتقول إن الدين الخارجي انخفض ب 111 مليون دولار خلال السنة المالية 2024-2025، وده بيأكد إن الاستراتيجية دي بدأت تؤتي ثمارها.
ولسه من كام يوم، مصر والصين وقعوا اتفاق إطار للمرحلة الأولى من برنامج مبادلة الديون، وده حصل خلال الزيارة التاريخية لرئيس مجلس الدولة الصيني لي تشيانج للقاهرة، وده معناه إن مصر مش ماشية في طريق المبادلة دي لوحدها، لأ ده في دعم سياسي واقتصادي كبير من شركاء مهمين زي الصين.
طيب، هل ده معناه إننا لقينا الحل السحري؟
الحقيقة لأ، دي خطوة من خطوات كتير لازم تمشي مع بعض، ولكن لازم الحكومة تشتغل على تحسين مناخ الاستثمار، وكمان بازم المشروعات اللي بتتم بالمبادلة تكون فعلا ناجحة وبتخلق شغل وتنمية، وبردوو لازم فيه متابعة حقيقية لنتائج كل مشروع بيتم تمويله بالطريقة دي.
لكن كمبدأ اه، مبادلة الديون فعلا ممكن تكون وسيلة ذكية تفتح الباب لتمويل تنموي جديد وتقلل الضغط عن الاقتصاد، بشرط إن التنفيذ يكون مضبوط، وبنسبة كبيرة مبادلة الديون هتكون وسيلة فعالة لزيادة التمويل التنموي.
والخلاصة، هي ان اللي مصر بتعمله دلوقتي هو إنها بتحول الالتزامات المالية اللي عليها لفرص استثمارية، ودع مهم جدا خاصة في الطريقة اللي بنتعامل بيها مع الدين الخارجي، وده كمان بيدي إشارة إيجابية للمستثمرين الأجانب، إن الدولة بتشتغل على إدارة الدين بشكل استراتيجي، وبتفتح الباب لشراكات حقيقية.
والقصة هنا مش بس أرقام، دي رسائل مهمة للعالم إن مصر ماشية في اتجاه الإصلاح، وإن في فرص حقيقية على الأرض.
