أيام صعبة على الدولار.. سر الانهيار الأكبر للعملة الأمريكية
يا ترى إيه سر التراجع الغريب ده في قيمة الدولار؟ وليه كل يوم بنشوف العملة الأمريكية بتسجل أرقام قياسية في الهبوط مكنش حد يتخيلها؟.. هل هي مجرد كبوة وهتعدي ولا بداية تغيير كبير في خريطة العملات العالمية؟.. والأهم إيه اللي عمله الرئيس الأمريكي دونالد ترامب في أول 100 يوم من حكمه عشان يوصل الدولار للمستوى ده.. مستوى محصلش من أيام الرئيس نيكسون في السبعينات؟
الدولار الأمريكي بيتجه إنه يسجل أسوأ أداء ليه في أول 100 يوم لرئيس أمريكي من أكتر من 50 سنة.. تخيلوا معايا.. تراجع بحوالي 9% من يوم تنصيب الرئيس ترامب في 20 يناير 2025 لحد النهاردة.. عشان نوضح الصورة أكتر.. متوسط أداء الدولار في أول 100 يوم لرؤساء قبل كده.. زي ريتشارد نيكسون أو حتى جو بايدن.. كان يا دوب بيزيد حوالي 0.9%.. يعني الفرق شاسع.. والهبوط الحالي يعتبر تاريخي بكل المقاييس.. لدرجة إن المحللين بدأوا يقارنوا الوضع الحالي باللي حصل سنة 1971.. أيام ما اتعرفت بـ"صدمة نيكسون".. لما أمريكا فكت ارتباط الدولار بالدهب.. وحصل وقتها تقلبات عنيفة جداً في أسواق الصرف العالمية.
و إيه اللي وصل الدولار للمرحلة دي بالسرعة دي؟
سياسات الرئيس ترامب التجارية.. الراجل من أول يوم وهو ماشي بسياسة فرض رسوم جمركية على شركاء أمريكا التجاريين الكبار.. زي الصين ودول تانية كتير.. طبعًا الخطوة دي معدتش بالساهل.. المستثمرين بدأوا يقلقوا من فكرة الحرب التجارية دي.. وبدأوا يدوروا على ملاذات آمنة لفلوسهم بره أمريكا.. وده طبيعي جدًا في عالم الاستثمار.. لما المخاطر بتزيد في مكان.. راس المال بيدور على مكان تاني أكتر استقرارا.
النتيجة المباشرة لسياسات ترامب دي.. كانت إننا شوفنا عملات تانية بتطلع بقوة قصاد الدولار.. اليورو الأوروبي والفرنك السويسري والين الياباني.. كلهم زادوا بأكتر من 8% قدام العملة الأمريكية.. وده بيوضح حجم الضغط اللي اتعرضله الدولار في فترة قصيرة جدًا.. ومش بس المستثمرين هما اللي قلقانين.. ده حتى المؤسسات المالية الكبيرة بدأت تحذر.. يعني مثلاً "دويتشه بنك" الألماني طلع تقرير بيقول فيه إن الدولار ممكن يكون داخل على اتجاه هبوطي هيكلي.. يعني مش مجرد تراجع مؤقت.. لأ.. ده ممكن يستمر لسنين جاية.. لدرجة إن الدولار ممكن يوصل لأدنى مستوياته قصاد اليورو من أكتر من عشر سنين.
جوه أمريكا نفسها.. الوضع مش أفضل كتير.. توقعات التضخم وصلت لـ 6.5%.. وده أعلى مستوى للتضخم هناك من سنة 1981.. يعني بنتكلم في أكتر من 40 سنة.. المواطن الأمريكي العادي بدأ يحس بالقلق ده.. واستطلاعات الرأي بتقول إن 7 من كل 10 أمريكان شايفين إن حملة الرسوم الجمركية اللي بيعملها ترامب دي.. هتزود التضخم أكتر وهترفع الأسعار عليهم.. وده بيأثر على القدرة الشرائية للمستهلكين.. وبيعمل حالة من عدم اليقين في السوق الأمريكي.
بناءً على كل التطورات دي.. بنك "يو بي إس جروب" السويسري.. وده من أكبر البنوك في العالم.. خفّض توقعاته لسعر الدولار للمرة التانية في أقل من شهرين.. وقالوا إن أداء الدولار مرتبط بشكل كبير بنتيجة الصراع التجاري اللي بين أمريكا والصين.. الصراع ده اللي لسه مفيش فيه أي تقدم واضح في الأسابيع الأخيرة.. وده بيزود حالة الضبابية حوالين مستقبل العملة الأمريكية.
فإحنا قدام تحول محتمل في مكانة الدولار كعملة احتياط عالمية.. المخاوف بتزيد يوم بعد يوم من السياسات التجارية والاقتصادية للإدارة الأمريكية الحالية.
والسؤال اللي بيطرح نفسه بقوة دلوقتي.. هل هيستمر التراجع ده في سعر العملة الأمريكية؟
كل المؤشرات والمعطيات بتقول إننا لسه مخلصناش من تبعات سياسات ترامب.. وإن الدولار قدامه أيام صعبة.. إلا إذا حصل تغيير جذري في السياسات دي.. أو ظهرت عوامل تانية مفاجئة تعيد التوازن للسوق.. لكن حتى الآن.. الصورة مش مبشرة بالنسبة للأخضر.. وهنفضل نتابع ونشوف الأيام الجاية مخبية إيه للدولار وللاقتصاد العالمي كله.
