تحرك جديد للمركزي.. تغيير حدود السحب من البنوك.. وترقب في سوق الذهب
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تحرك جديد للمركزي، وتغيير حدود السحب من البنوك، وترقب في سوق الذهب.
نبدأ من القطاع المصرفي.. وأعلن البنك المركزي المصري إنه سحب سيولة من السوق بقيمة 310.4 مليار جنيه من 19 بنك في إطار عطاء السوق المفتوحة.. وده بعد القرار الأخير اللي غير بيه نظام قبول العطاءات وبقى بسعر فائدة 24.5%.
ولو نفتكر.. الأسبوع اللي فات تحديدًا يوم التلات 8 يوليو.. المركزي كان سحب 309.7 مليار جنيه من 16 بنك.. وده كله بهدف سد عجز الموازنة.
اللي حصل ده جاي بعد تعديلات أعلن عنها البنك في أبريل اللي فات.. لما قرر يقبل كل طلبات البنوك اللي بتتقدم للعطاء الأسبوعي من غير ما يحدد لكل بنك حصة معينة.. وده ساعده يسحب سيولة ضخمة من البنوك بشكل أسرع.. خصوصًا مع التضخم اللي بيضغط على الاقتصاد.
البنك المركزي في مصر بيستخدم طريقتين أساسيين علشان يسحب السيولة من البنوك:
أول طريقة.. عطاء أسبوعي مدته 7 أيام بفائدة ثابتة بيتم تحديدها كل تلات.. ودي اللي المركزي بقى معتمد عليها بشكل أساسي اليومين دول.
أما التانية.. فهي عطاء لمدة 28 يوم.. بس بفائدة متغيرة بتساوي متوسط سعر العائد على الإيداع والإقراض.
ولسه مكملين مع أخبار البنك المركزي..
النهارده أعلن رسميًا إنه هيوقف العمل بالقرار اللي كان صادر يوم 8 يوليو 2025.. واللي كان بيزود الحد الأقصى للسحب النقدي من فروع البنوك لحد 500 ألف جنيه للأفراد والشركات.
وبكده.. نرجع تاني للنظام القديم.. يعني الحد الأقصى للسحب من الفروع يرجع لـ 200 ألف جنيه بس للأفراد والشركات.
كمان قرر إلغاء التوجيه رقم 482 اللي صدر يوم 8 يوليو.. واللي كان بيمد ساعات العمل في بعض فروع البنوك لحد الساعة 5 مساءً.
ودلوقتي البنك المركزي أكد في خطاب رسمي للبنوك إننا نرجع تاني للمواعيد الرسمية اللي كنا ماشيين بيها قبل كده.. يعني كل فروع البنوك تخلص شغلها الساعة 3 العصر بالظبط.. وده هيبدأ يتطبق من النهارده.
نروح بقى لـ سوق الدهب
الأسعار النهارده، التلات 15 يوليو 2025، استقرت شوية.. بس الطلب على الدهب لسه عالي.. خصوصًا بعد ما زادت التوترات التجارية بين أمريكا من ناحية.. والاتحاد الأوروبي والمكسيك من ناحية تانية.
ووفقًا لتحديثات موقع "آي صاغة".. الأسعار كانت كالتالي:
جرام عيار 24: 5331 جنيه.
جرام عيار 22: 4887 جنيه.
جرام عيار 21: 4665 جنيه.
جرام عيار 18: 3998 جنيه.
جرام عيار 14: 3110 جنيه.
الجنيه الدهب: 37320 جنيه.
وسعر الأوقية عالميًا وصل لـ 3371 دولار.
الأسعار العالمية كمان في حالة صعود.. بسبب ترقّب السوق لبيانات التضخم في أمريكا.. واللي ممكن تأثر بشكل كبير على قرارات الفايدة الجاية من الاحتياطي الفيدرالي.
وأخيرًا نختم بحبر من وزارة السياحة
"شريف فتحي" وزير السياحة والآثار أعلن إن عدد السياح اللي زاروا مصر خلال أول نص السنة دي زاد بنسبة 24%.. ووصلنا لـ 8.7 مليون سائح.
كمان في يونيو 2025 بس.. عدد السياح زاد بنسبة 22% مقارنة بنفس الشهر السنة اللي فاتت.
ومن ناحية تانية.. الوزير أشار لنقطة مهمة جدًا.. قال إن حوالي 70% من الناس اللي شغالين في قطاع السياحة مش خريجين كليات سياحة وفنادق.. وده بيخلينا محتاجين نشتغل على برامج تدريب وتأهيل علشان نطلع كوادر مهنية تناسب سوق العمل السياحي.
