حصار السيسي.. سر التحركات المريبة في السوق السوداء للدولار

 
فيه تحركات غريبة ومريبة بتحصل فى السوق السودا للدولار فى الفترة الأخيرة.. تحركات بتقول ان سعر العملة الأمريكية ما بقاش مرتبط أوي بقوانين العرض والطلب وبقا اللى بيحركوا ألاعيب وحيل شيطانية بتشارك فيها دول عظمى وأجهزة استخبارات عارفة كويس أوي هي بتعمل ايه وعاوز توصل لفين.. ومش طبيعي أبدا ان سعر الدولار يكون مستقر فى البنوك من شهر مارس اللى فات عند حدود 31 جنيه فى نفس الوقت سعره فى السوق السودا يوصل فى مرحلة من المراحل الى مستوى 50 جنيه.. فيا ترى ايه اللى بيحصل بالظبط ؟ وايه الهدف من اغتيال الجنيه المصري ؟ ومين المستفيد من الوضع اللى وصل ليه سوق الصرف ؟ وامتى ممكن تنتهي الفوضى الموجودة فى اسعار العملات واللى للأسف دخل فيها عملات تانية كتيرة غير الدولار زي الدينا الكويتي والريال السعودي واليوان الصيني وغيرهم من العملات؟
 

 
قولنا لحضراتكم قبل كده ان فيه غضب كبير جدا في معظم العواصم الغربية من الرئيس عبدالفتاح السيسي بعد رفضه ملف تهجير الفلسطينين الى سيناء.. وكل زعماء أوروبا سواء اللى زارو مصر مؤخرا أو تواصلوا هاتفيا مع السيسي شافوا وعرفوا بنفسهم بعيد عن التقارير المخابراتية رفض الرئيس المصري القاطع لسيناريو نقل اهالى قطاع غزة الى مصر وده السيناريو اللى بتحاول تنفذه أمريكا وإسرائيل بمباركة من معظم الدول الغربية.
وطبعا رفض السيسي للضغوط الكبيرة اللى اتمارست على مصر مش هيمر مرور الكرام وهيكون فيه محاولات للانتقام من مصر والضرب في اقتصادها.. وده اللى بدأ فعلا في الكام يوم  اللى فاتوا .. فيا ترى ايه اللى حصل بالظبط ؟ وهل مصر هتقدر تصمد في وجه الحملات الغربية 
لازم نكون عارفين الغرب والأمريكان مش هينسوا للرئيس السيسي انه كان سبب كبير في افشال مخطط الشرق الأوسط الكبير اللى أمريكا كانت عاوزة تصنعوا من خلال جماعات الاسلام السياسي اللى وصلت للحكم في عدد من الدول العربية وكان اهمهم طبعا الاخوان في مصر وكانت الخطة ماشية والدنيا تمام لغاية ما ظهر الرئيس السيسي وانحاز لمطالب الشعب في 30 يونيو 2013 وغامر بمستقبله وبحياته في سبيل تخليص البلد من حكم جماعة كانت جاية تنفذ مخطط أمريكي محدش كان عارف ممكن يودينا فين بالظبط.. السيسي ما افشلش خطة الشرق الأوسط الكبير بس لا ده كمان في الأيام الأخيرة بيتصدى لواحد من أقذر المخططات اللى بتسعى لتصفية القضية الفلسطينية من خلال تهجير أهالى قطاع غزة الى سيناء.
طب الأمريكان والغرب هينتقموا ازاى من السيسي؟ 
ده سؤال مهم جدا .. اكتر حاجة مصر بتعانى منها في الفترة الأخيرة هي الأوضاع الاقتصادية الصعبة اللى ظهرت من بعد اندلاع الحرب الروسية الأوكرانية واللى تسببت في وجود فجوة تمويلية كبيرة في الموازنة العامة نتيجة ارتفاع أسعار الطاقة والحبوب ومعاهم انهيار قيمة الجنيه أمام الدولار في ظل العجز الواضح في مصادر النقد الأجنبي وشح العملة.. وعشان كده الأمريكان بيلعبوا على المكشوف وبيحاربوا السيسي من المنطقة دي ولو حضراتكم ملاحظين فيه كمية تقارير كبيرة جدا طلعت الفترة اللى فاتت من مؤسسات تمويل ومراكز أبحاث بتضرب في الجنيه وبتبشر المصريين بمستقبل أكثر سوءا
التقارير دي والاشاعات الكتيرة عن تحريك سعر الصرف فى مصر علت الطلب على الدولار وخلت فيه اقبال كبير جدا على شراء العملة الأمريكية وطبعا مع زيادة الاقبال سعر الدولار سجل مستويات قياسية عمرها محصلت فى تاريخ مصر ووصل سعر دولار السوق السودا الى مستويات قريبة جدا من 50 جنيه يعنى فيه زيادة حوالى 60% بين السعر الرسمي للعملة المريكية فى البنوك وسعرها فى السوق السودا  
وازاى التقارير دي بتأثر على قيمة الجنيه وعلى مستقبل الاقتصاد؟
بص يا سيدي تقارير وكالات التصنيف واحدة من أهم المؤشرات اللى بيبص عليها أي مستثمر اجنبي عاوز ييجي يضخ فلوس في مصر وطبعا مفيش مستثمر ممكن يغامر بفلوسه في بلد وكالات التصنيف بتدعي انها بتواجه مشاكل في سداد ديونها وانها ممكن تتعثر عن التزاماتها الخارجية بالإضافة الى كلام مكرر عن انخفاض قيمة الجنيه وده بيولع السوق السودا وخلا سعر الدولار يوصل لمستويات تاريخية أمام الجنيه .. وطبعا ده ليه انعكاساته على الأسعار في السوق خصوصا ان مصر بتعتمد في معظم احتياجاتها على الاستيراد من الخارج واستيراد يعنى دولار .. يعنى زيادة في الطلب على العملة الأمريكية وكل ما زاد الطلب كل ما السعر هيزيد وهنفضل ندور في دايرة مفرغة 
طب السيسي بيراهن علي ايه في حربه مع الأمريكان والدول الغربية؟ 
أول حاجة بيراهن عليها السيسي هي وعى المصريين وادراكهم للمخطات اللى بتحاك ضد البلد ولحد دلوقتى الرهان ده ناجح وكسبان والشعب مستحمل ظروف صعبة عشان يقف جنب البلد والناس مرحبة ومبسوطة جدا من موقف القيادة السياسية في الأزمة الفلسطينية ولو لاحظتوا يمكن أول مرة من فترة طويلة مثلا يتم رفع أسعار البنزين ومتحسش ان الناس زعلانة اوي زي قبل كده
السيسي كمان بيراهن على تعظيم العوائد الدولارية لمصر وزيادة النقد الأجنبي من كذا مورد اهمهم طبعا زيادة الصادرات المصرية والوصول الى حلم ال 100 مليار دولار صادرات سنويا ولو وصلنا للرقم ده هنقد نسد عجز الميزان التجارى ونعادل الصادرات والواردات كمان فيه اهتمام ملحوظ بتعظيم عوائد السياحة وكمان زيادة رسوم قناة السويس والسياحة والقناة محققين ف 2023 ارقام كبيرة جدا .. وفيه أفكار تانية ليها علاقة بإعادة تحويلات المصريين الى سابق عهدها وتحصيل موارد دولارية بأفكار خارج الصندوق زي مبادرة سيارات المغتربين والسماح للمصريين العاملين في الخارج باستيراد سيارات مقابل وديعة دولارية يتم استيرادها بعد 5 سنين