مليون شقة في 4 سنوات.. مصر تستعد لزلزال في سوق الإسكان
تخيل إن مصر تستهدف توفير مليون وحدة سكنية جديدة خلال 4 سنين بس.. باستثمارات ضخمة بتوصل لتريليون جنيه.
الخطة الجديدة مش مجرد بناء شقق وتسليم مفاتيح.. دي تغيير كبير في طريقة توفير السكن في مصر، لأن الحكومة بتستهدف إتاحة أكتر من نظام يناسب احتياجات وقدرات شرائح مختلفة من المواطنين.
طيب إيه تفاصيل الخطة؟
البرنامج القومي الجديد بيستهدف توفير مليون وحدة سكنية بمختلف المستويات، بالتعاون مع صندوق تحيا مصر، وبمشاركة القطاع الخاص في تنفيذ عدد من المشروعات.
والجديد إن الوحدات مش كلها هتكون للبيع والتمليك.. الخطة بتضم 6 أنماط مختلفة، أولها الإسكان الاجتماعي لمحدودي الدخل، والإسكان المتوسط وفوق المتوسط، وكمان وحدات للإيجار، والإيجار المنتهي بالتملك.
وفيه كمان نموذج جديد للتوسع في الإسكان الاجتماعي بالشراكة مع المطورين العقاريين، بالإضافة إلى توفير وحدات سكنية لعمال المصانع بالقرب من أماكن عملهم.
والفكرة هنا إن المواطن مش هيكون قدامه اختيار واحد بس، لكنه هيقدر يختار نظام السكن المناسب لظروفه، سواء الإيجار أو التملك أو الإيجار اللي ينتهي بامتلاك الوحدة.
والأهم إن الحكومة بدأت بالفعل التحرك في ملف الشراكة مع القطاع الخاص، من خلال اتفاقيات تستهدف تنفيذ 20 ألف وحدة سكنية في 8 مدن جديدة، مع تخصيص 80% من الوحدات للإسكان الميسر و20% للوحدات والأنشطة التجارية التي يطورها المستثمرون.
كمان الخطة بتستهدف إن المجتمعات السكنية الجديدة تكون متكاملة الخدمات، مش مجرد عمارات سكنية، يعني مدارس ومستشفيات وخدمات ومواصلات.
لكن رغم ضخامة الرقم والاستثمارات المعلنة، لسه فيه تفاصيل مهمة منتظر الإعلان عنها، زي توزيع المليون وحدة على الفئات المختلفة، ومواعيد التنفيذ والطرح، وشروط الحجز وأنظمة السداد.
يعني السؤال مش بس إزاي مصر هتوفر مليون شقة.. لكن كمان مين هيقدر يحصل عليها، وبأي نظام وتكلفة؟
