الدولار ممكن يرجع لـ48 جنيه من جديد؟.. وهل موجة الارتفاع الأخيرة قربت تخلص؟
رغم أن الدولار تجاوز مستوى 56 جنيه داخل البنوك المصرية، فإن فيه سيناريوهات بتطرح إمكانية تراجعه خلال الفترة الجاية، ووصوله لمستويات 48 و49 جنيه.
وبحسب تقديرات بنك الاستثمار الأمريكي مورجان ستانلي، الدولار ممكن يتحرك بين 48 و50 جنيه خلال العام المالي 2026/2027، وفي السيناريو الأكثر تفاؤلًا، ممكن يوصل لـ46 أو 48 جنيه.
لكن إيه اللي ممكن يخلي الدولار ينزل؟
السر في زيادة موارد مصر من العملة الأجنبية، زي تحويلات المصريين بالخارج، وإيرادات السياحة وقناة السويس، وزيادة الصادرات، وكمان عودة الاستثمارات الأجنبية.
وفيه عامل مهم جدًا، وهو أسعار النفط.. لأن انخفاضها ممكن يقلل فاتورة استيراد الطاقة، ويخفف الضغط على الدولار.
لكن خلي بالك، التوقعات دي مش ضمانات، لأن استمرار التوترات الإقليمية وارتفاع أسعار الطاقة ممكن يخلي الدولار يفضل عند مستويات مرتفعة.
وفي المقابل، تقديرات برايم بتطرح نطاقًا أكثر تحفظًا بين 50 و54 جنيه بنهاية العام.
يعني من الآخر، تراجع الدولار ممكن.. لكن مرتبط بتحسن موارد النقد الأجنبي واستقرار الظروف الاقتصادية.
