هل اللي حصل للدهب في 2025 ممكن يتكرر في 2026؟
يا ترى اللى حصل للدهب فى 2025 ممكن يحصل في 2026؟ وهل الارتفاع الكبير في اسعار المعدن النفيس ممكن يتكرر تاني ؟ وهل المكاسب اللي خلت ناس تصحى تلاقي ثروتها بتكبر في شهور قليلة قابلة للتكرار ولا السوق خلاص قال كلمته؟
الدهب في 2025 عمل حالة نادرة في السوق العالمي والمصري في نفس الوقت المعدن الأصفر بقى حديث الناس مش بس المستثمرين ولا التجار وده لأن اللي حصل ما كانش صعود عادي ده كان انفجار في الأسعار خلى ناس كتير تعيد حساباتها في الادخار والاستثمار.
خلال سنة واحدة أسعار الدهب في مصر ارتفعت بحوالي 56% وده رقم ضخم بمعايير أي سوق وعيار 21 بدأ السنة عند مستوى 3740 جنيه ووصل لقمم تاريخية قرب 6100 جنيه قبل ما يقفل السنة عند حوالي 5830 جنيه وده معناه إن اللي كان حاطط فلوسه في الدهب من أول 2025 شاف مكاسب ما كانش يتخيلها.
عالميا المشهد كان أقوى الأونصة في البورصات العالمية سجلت ارتفاع سنوي تجاوز 65% وده أكبر صعود سنوي من سنة 1979 الأونصة بدأت 2025 عند مستوى 2624 دولار ووصلت لقمة تاريخية عند 4555 دولار قبل ما تقفل السنة عند 4318 دولار.
اللي حصل في 2025 ما كانش نتيجة عامل واحد ولا مضاربات عابرة ده كان نتيجة سلسلة قرارات نقدية ومالية وسياسية غيرت شكل المخاطر في الاقتصاد العالمي البنوك المركزية نفسها بقت مشتري رئيسي للدهب والدول بدأت تدور على ملاذ آمن يحميها من تقلبات العملات وارتفاع الديون والصراعات الجيوسياسية.
طيب هل السيناريو ده ممكن يتكرر في 2026 بنفس القوة ؟
الحقيقة إن تكرار نفس المكاسب الخرافية صعب لكن ده ما يعنيش إن الدهب فقد بريقه التوقعات رايحة إن المعدن النفيس يفضل مدعوم لكن بإيقاع أهدى.
في 2026 الصورة العالمية لسه مليانة عدم يقين التضخم عالميا بيتراجع لكن ما اختفاش وأسعار الفايدة متوقع ليها خفض تدريجي وده عامل إيجابي للدهب لأن أي خفض في الفايدة بيقلل تكلفة الفرصة البديلة وبيخلي الاحتفاظ بالدهب أكتر جاذبية.
كمان التوترات السياسية العالمية لسه موجودة والديون السيادية في مستويات مرتفعة تاريخيا والبنوك المركزية في دول كتير مستمرة في زيادة حصة الدهب في الاحتياطيات وده كله بيخلق طلب طويل الأجل على المعدن النفيس.
محليا في مصر سعر الدهب مرتبط بالسوق العالمي وبسعر الصرف ولو الجنيه فضل مستقر أو اتحسن زي اللي حصل في النصف التاني من 2025 ده ممكن يحد من القفزات الحادة لكن مش هيمنع الاتجاه الصاعد.
السيناريو الأقرب في 2026 إن الدهب يحقق مكاسب جديدة لكن بشكل تدريجي مع فترات تصحيح طبيعية وده سلوك صحي لأي سوق مش كل صعود هيبقى بنفس جنون 2025.
الدهب هيفضل أداة تحوط وحفظ قيمة أكتر منه فرصة مضاربة سريعة واللي داخل السوق في المرحلة الجاية محتاج نفس طويل وفهم إن المكسب الحقيقي مش في القمة لكن في التوقيت والإدارة الصح للقرار.
