استثمار ضخم بقيمة 1.6 مليار دولار.. عملاق صناعي صيني ينقل مركز عملياته إلى مصر
منطقة السخنة بقت خلال السنين اللي فاتت واحدة من أهم مراكز الاستثمار الصناعي في مصر.. بس اللي جاي أكبر بكتير! شركة صينية عملاقة قررت تبني مجمع صناعي ضخم هيغير شكل الصناعات المعدنية والهندسية في البلد
استثمار يتخطى مليار و600 مليون دولار، ومساحة مهولة، ومصانع بتخدم كل الصناعات اللي مصر بتحاول توطّنها بقالها سنين.. يلا نعرف القصة كاملة وإزاي المشروع ده ممكن يبقى نقطة تحول للصناعة المصرية.
في وقت مصر بتسابق الزمن علشان تبقى مركز صناعي إقليمي، ظهر مشروع "شين فينج" الصيني كواحد من أضخم المشروعات اللي دخلت المنطقة الاقتصادية لقناة السويس من يوم ما اتأسست، الشركة قررت تنقل مركز عملياتها الإقليمي وتبني مجمع صناعي متكامل في السخنة، باستثمار يتخطى 1.65 مليار دولار، رقم ضخم ومشروع أكبر من إنه يتلخص في جملة.
المجمع الجديد معمول على مساحة هائلة 3.75 مليون متر مربع يعني مدينة صناعية كاملة، والملفت إن المشروع معمول على مرحلتين، وكل مرحلة فيها مصانع بتخدم صناعات استراتيجية مصر بتحاول تقويها من زمان.
المرحلة الأولى واللي هي قلب الصناعات الهندسية
أول مرحلة فيها 4 مصانع أساسيين، وكل مصنع منهم ليه تأثير مباشر على صناعات ضخمة جوه البلد.. عندك مثلًا مصنع مكوّنات أقراص فرامل السيارات وده بيقدم قطع مهمة جدًا لأي خط إنتاج سيارات، سواء محلي أو للتصدير.
وفي مصنع تاني متخصص في مكونات الأجهزة المنزلية، الهياكل، الأسطمبات، القطع الدقيقة كل اللي بيحتاجه مصانع التلاجات والغسالات اللي بتشتغل في مصر.
كمان في مصنع كبير للمسامير والصواميل والبراغي، الحاجات اللي الصناعات الهندسية كلها واقفة عليها
أما الأضخم فهو مصنع الصلب المدرفل على الساخن، وده منتج مصر بتستورد منه كتير، ووجوده محليًا هيوفر فلوس ويفتح باب تصدير كمان.
المرحلة الثانية.. قيمة أعلى وصناعات أدق
المرحلة التانية بقى فيها توسع كبير 5 مصانع إضافية بتغطي احتياجات الإنشاءات، والصناعات المعدنية، وصناعة السيارات.
مصانع لسبائك الألومنيوم والمغنيسيوم، مصانع للهياكل الفولاذية الثقيلة، مكونات طبلة الفرامل، وأجزاء المعدات الثقيلة.. ده غير مصنع الصلب المدرفل على البارد اللي بيخدم الصناعات الدقيقة جدًا
8 آلاف فرصة عمل ونقلة للصناعة المصرية
المشروع كله هيشغل أكتر من 8 آلاف وظيفة مباشرة، غير آلاف الوظائف غير المباشرة، نقل، صيانة، خدمات، لوجستيات، إنشاءات، وكل الصناعات اللي هتتأثر بوجود مجمع بالحجم ده.
الأهم إن المجمع هيخلق قاعدة صناعية ضخمة بتغذي مصانع موجودة بالفعل في مصر، زي مصانع الأجهزة المنزلية العالمية اللي شغالة في العاشر والسخنة، ومصانع الضفائر والكابلات ومكونات السيارات اللي بتصدر لأوروبا وآسيا، وجود مدخلات إنتاج محلية هيقلل فاتورة الاستيراد بشكل ضخم، وهيزود نسبة المكون المحلي في التجميع، وده معناه تنافسية أعلى وقدرة أكبر على التصدير.
ده غير ان المشروع واخد موقع ذهبي على محور السخنة القناة.. قدامه 6 موانئ بحرية، ووراه شبكة لوجستية ضخمة، وطاقة متوفرة، وبنية تحتية من أعلى المستويات، التكامل ده يخلي المجمع يخدم أسواق الشرق الأوسط وإفريقيا وأوروبا بسهولة.
ومش بس كده الصين دلوقتي بتمثل نص الاستثمارات الموجودة في المنطقة الاقتصادية، يعني فيه شراكة قوية بتتشكل، ومجمع "شين فينج" هو أكبر دليل عليها.
يعني ببساطة المشروع ده مش مجرد مصانع جديدة ده خطوة استراتيجية بتغير شكل الصناعة في مصر، وبتفتح أبواب جديدة للتصدير والتشغيل، وبتقوي وجود الصين داخل المنطقة الاقتصادية.
ولو اتنفذ بالكامل زي المخطط ممكن يبقى واحد من أهم المشروعات اللي حولت السخنة لمركز صناعي عالمي.
