انطلاقة ثورية.. شاومي تختار العين السخنة لإقامة أول مصنع لسياراتها الكهربائية في مصر
واضح إن مصر داخله على مرحلة جديدة في الصناعة، مش بس تصنيع موبايلات ولا أجهزة بيت، لأ.. إحنا بنتكلم دلوقتي عن عربيات كهربا هتتعمل هنا على أرضنا! الشركة اللي كانت دايمًا مرتبطة بالموبايلات والتابات والسمارت شاشات، "شاومي"، قررت تفتح فصل جديد من قصتها في مصر، وبالتحديد في العين السخنة، وده بالتعاون مع مجموعة الصافي اللي شغالة بقوة في مجال الصناعات المتطورة.
اللي بيحصل في العين السخنة مش مشروع عادي، دي انطلاقة ثورية حقيقية .. مجموعة الصافي ناوية تخلص إنشاء مجمع صناعي متكامل هناك على مساحة ضخمة حوالي 73 ألف متر مربع، قبل نهاية سنة 2026 .. المجمع ده مش هيقتصر على إنتاج الأجهزة المنزلية، لأ كمان هيضم منطقة مخصصة لتصنيع سيارات شاومي الكهربائية، وده معناه إن مصر داخلة رسميًا في عالم الصناعات المستقبلية والتكنولوجيا المتقدمة.
مجموعة الصافي، اللي استثماراتها وصلت لـ 80 مليون دولار في الصناعات الإلكترونية، عندها خطة طموحة إنها تزود المكون المحلي في كل منتجاتها خلال الفترة الجاية، يعني بدل ما نستورد قطع كتير، نبدأ نصنعها هنا، فمثلًا في أجهزة التلفزيون، النسبة دي هتعلى من 60% لـ80%، وفي الموبايلات من 55% لـ85%.
والموضوع مش واقف عند كده، الشركة كمان شغالة على شراكة مع جنرال إلكتريك لإنتاج أجهزة طبية داخل مصر، وبدأوا فعلاً في تصنيع أجهزة الموجات فوق الصوتية، ولسه مكملين بخط إنتاج أجهزة الرنين المغناطيسي سنة 2026، وده معناه توسع في مجالات تانية حيوية بجانب الإلكترونيات.
كمان "الصافي" بتستهدف تصدير منتجاتها برا مصر، مستفيدة من اتفاقيات التجارة الحرة اللي مصر موقعاها مع دول زي أوروبا، المغرب العربي، والشرق الأوسط وأفريقيا، وده هيفتح الباب قدام المنتجات المصرية تدخل أسواق جديدة وتنافس عالميا.
وعلشان الصورة تبقى أوضح، "الصافي" عندها كمان مجمع صناعي ضخم في مدينة 6 أكتوبر، بيغطي مساحة تشغيلية حوالي 25 ألف متر مربع. هناك بيتصنع موبايلات وشاشات شاومي للسوق المحلي والتصدير، والمصنع ده لوحده بيقدر ينتج حوالي 10 ملايين موبايل في السنة، غير 500 ألف شاشة تلفزيون، والأرقام دي مرشحة للزيادة مع الطلب الكبير في السوق.
ببساطة، اللي بتعمله "شاومي" و"الصافي" مع بعض مش مجرد مشروع إنتاج .. ده نقلة نوعية في الصناعة المصرية، العربيات الكهربا اللي كانت بنشوفها في أوروبا والصين، ممكن جدًا نشوفها قريب بعلامة "صنع في مصر" وباسم شاومي.
