مشروعات الجلالة هتعمل نقلة في المدن الساحلية.. مصر بتخطط لمشروعات ضخمة
الحكومة المصرية طرحت 9 فرص استثمارية مكتملة في مدينة الجلالة من خلال خريطة مصر الاستثمارية وفق عدة نظم منها الشراكة مع القطاع الخاص وحق الانتفاع والتملك والإدارة والتشغيل.. فيا ترى إيه اللى بيحصل في الجلالة؟ وليه كل الأنظار اتشدت للمشروع ده فجأة؟ وإزاي المستثمر اللى هيدخل النهاردة ممكن يكون بيحجز لنفسه مكان في واحدة من أهم مناطق الاستثمار اللى مصر بتجهزها للسنين الجاية؟
في الساعات الأخيرة مصر أعلنت بشكل رسمي عن طرح 9 فرص استثمارية كاملة في مدينة الجلالة وده بالتعاون بين الهيئة العامة للاستثمار وجهاز مشروعات أراضي القوات المسلحة.. في طرح عالمي بكل معنى الكلمة.. لأن الدولة طرحته بأنظمة متنوعة تناسب كل نوع من المستثمرين، من أول الشراكة مع القطاع الخاص، لغاية حق الانتفاع، والتملك، والإدارة، والتشغيل. بمعنى أدق… اللى عايز يدخل، قدامه كل الطرق مفتوحة.
الفرص المطروحة نفسها تقول إن الدولة رايحة فين. مارينا اليخوت العملاقة على البحر الأحمر… فندق ساحلي كامل… مدينة ألعاب مائية… مستشفى الجلالة… حي سكني راقٍ… الداون تاون أفينيو والمحور الخدمي… منتجعات ريزورت 5 و7… وفندق الجلالة الجبلي فوق الهضبة… ورويال كمبوند… ومنتجع الجلالة هايتس. مجموعة مشاريع تكمّل بعض وتأسس مدينة واقفة على رجليها… مش بس مشروع سياحي وخلاص.
الطرح ده ماجاش كده من فراغ. حسام هيبة، الرئيس التنفيذي للهيئة العامة للاستثمار، ومعاه مساعد رئيس جهاز مشروعات أراضي القوات المسلحة للتطوير، نزلوا بنفسهم جولة تفقدية في الجلالة عشان يحطوا اللمسات الأخيرة على خطة الترويج العالمية. والرسالة واضحة… الجلالة داخلة مرحلة جديدة.
هيبة قال جملة مهمة جدا: أهم حافز للاستثمار في الجلالة… هي الجلالة نفسها. ليه؟ لأن الدولة جهزت مدينة كاملة من تحت لفوق. طرق… محطات رفع مياه… شبكات كهرباء وصرف صحي… مستشفى… جامعة… مساكن للعاملين… يعني مشروعات مش معمولة عشوائي، دي معمولة عشان المدينة تشتغل. وطبيعة الجلالة الجبلية بتخلق فرص ضخمة للسياحة بكل أشكالها… سياحة فاخرة… شاطئية… جبلية… مؤتمرات… يخوت… كل حاجة مدروسة.
المسؤول عن مشروعات المدينة استعرض حجم الشغل اللى اتعمل… واتكلم عن مساحة المدينة اللى بتوصل لـ17 ألف فدان تقريباً، ما بين مستوى سطح البحر لحد ارتفاع 800 متر، ومربوطة بطرق جبلية وتليفريك شغال بانتظام. وده مش منظر بس… ده عنصر جاذب للسياحة والاستثمار في نفس الوقت.
الخطة التسويقية اللى اتكلم عنها هيبة بتقول بوضوح إن الدولة عايزة الجلالة تبقى على خريطة العالم. الفرص هتتحط على خريطة مصر الاستثمارية… وهتكون ضمن الأولويات في كل الجولات الترويجية في الخليج وشرق آسيا… وفي الآخر هيتم إطلاق مؤتمر دولي للترويج ليها على أرض الجلالة نفسها. وده معناه إن الاستثمار في الجلالة مش محلي… ده مشروع بيخاطب رأس المال العالمي.
واحدة من أهم الحاجات اللى اتقالت، إن الجلالة بعد اكتمال التطوير هتضم المارينا الرئيسية لليخوت على البحر الأحمر. المارينا دي مش مجرد رسو مراكب، دي قادرة تستقبل 600 يخت… ومعاها طاقة فندقية كبيرة تستوعب سياحة اليخوت والسياحة الشاطئية مع بعض. غير المراكز الإدارية والتجارية اللى تدي المدينة قدرة على تشغيل أنشطة اقتصادية بقيمة مضافة… يعني مش سياحة بس… لأ، حياة كاملة.
