مصر تكتشف طريقة لاستخراج الذهب الأصفر من 3.5 مليون فدان.. توصيات لأفضل إنتاج
مصر بدأت موسم "الدهب الأصفر" من جديد و3.5 مليون فدان بيتزرعوا قمح.. بس يا ترى الموسم الجديد هيكسر أرقام الإنتاج السنة دي فعلاً ويوصل لـ10 ملايين طن؟.. وهل الفلاحين في كل المحافظات جاهزين يطبقوا التعليمات الجديدة بحذافيرها؟.. ولو التقاوي المعتمدة مش متوفرة في الجمعيات، المفروض الفلاحين يعملوا إيه؟.. وهل ممكن فعلا مصر توصل لمرحلة الاكتفاء الذاتي من القمح قريب؟
النهارده المحافظات المصرية كلها بدأت موسم زراعة القمح الجديد، واللي يعتبر واحد من أهم المحاصيل الاستراتيجية في البلد، لأنه ببساطة هو عمود الأمن الغذائي لكل بيت مصري.
الدولة حطاه في أول أولوياتها، والموسم ده تحديدًا بيتقال عليه موسم الخير والرزق، لأن التوقعات بتقول إن الإنتاج ممكن يوصل لأكتر من 10 ملايين طن قمح بنهاية الموسم، وده رقم كبير جدًا ومبشر.
الدكتور محمد علي فهيم، رئيس مركز معلومات تغير المناخ، قال إن الموسم ده جاي ومعاه الأمل للفلاحين بعد فترة طويلة من الترقب، وبدأ مع شهر “هاتور” اللي المزارعين بيسموه “أبو الدهب المنثور”، وده مش من فراغ، لأن القمح فعلاً بيمثل “الذهب الأصفر” اللي بيرجع الحياة والرزق لكل بيت في الريف المصري.
فهيم قال كمان إن الموسم ده مش مستحمل أي أخطاء، يعني لازم كل فلاح يلتزم بالإرشادات الفنية علشان الإنتاج يطلع بأعلى جودة.. أول وأهم حاجة الالتزام بالخريطة الصنفية، يعني كل منطقة تزرع الصنف المناسب ليها، وكمان ضروري استخدام التقاوي المعتمدة من الجمعيات الزراعية أو الشركات الموثوقة، مش أي تقاوي مجهولة.
ونصح كمان بالزراعة على مصاطب في أراضي الوادي والدلتا (ما عدا الأراضي المالحة)، مع إضافة جرعة تنشيطية من النشادر وقت الزراعة.. أما رية التشتية أو “رية المحاياة” فهي مهمة جدًا، وما ينفعش تتأخر أكتر من 25 يوم من يوم الزراعة، لأن التأخير بيأثر على نمو النبات وبيخلي ورقه يصفر.
كمان فهيم اتكلم عن مكافحة الحشائش باستخدام مبيدات معينة زي “جيروستار” و”دربي”، علشان تحافظ على المحصول، ومع التسميد نصح بإضافة 150 كيلو جرام نترات نشادر للفدان، ورش مركبات فيها فسفور وحديد وزنك بعد الرية بأسبوع.
في النهاية، الالتزام بالتوصيات دي هو سر نجاح الموسم ده، اللي ممكن يبقى من أكتر المواسم إنتاجًا في تاريخ مصر الحديث.. لأن موسم القمح السنة دي مش بس موسم زراعة، ده موسم أمل، ورحلة جديدة للبحث عن “الدهب الأصفر” اللي بيأمن رغيف العيش لكل مصري.
