الكيلو بمليون دولار.. أغلى شاي في العالم؟

تخيل تشرب شاي بس الكيلو منه سعره يتعدى مليون دولار.. ده مش هزار، ده شاي دا هونغ باو، أغلى شاي في العالم، وبيطلع من دولة واحدة بس.. الصين.

الشاي ده بيتزرع في جبال اسمها وويي ومن ست شجرات بس.. أيوه، ست شجرات حرفيًا وبعضها موجود من أيام سلالة مينج من مئات السنين.

اسمه معناه "العباءة الحمراء الكبيرة"،
والقصة وراه إن إمبراطور صيني قدم عباءته علشان يجيب منه شوية شاي يعالج بيه والدته.

والطعم مش زي أي شاي تاني
نكهة زهرية خفيفة، مع طعم معدني وخشبي مميز، وبيستحمل يتنقع أكتر من مرة من غير ما يفقد طعمه.

سعره العالي سببه ندرته الشديدة، وإن إنتاجه معقد جدًا، من الأكسدة الجزئية للتحميص اليدوي خطوة خطوة، بخبرات نادرة وتكلفة عالية.

علشان كده بقى شاي فاخر جدًا، وبيستخدم في الهدايا الرسمية والمناسبات الكبرى، لدرجة إن الرئيس الأمريكي نيكسون أخد منه 200 جرام
كهدية دبلوماسية من الصين.