من العجز للتصدير.. إزاي مصر بقت مركز إقليمي للطاقة في الشرق الأوسط؟
في وقت كتير من الدول لسه بتدور على بدائل للطاقة وتواجه مشاكل في الإمدادات، مصر بدأت فعلا تشق طريقها بثقة علشان تبقى مركز إقليمي للطاقة في الشرق الأوسط.
بعد سنين من الاعتماد على الاستيراد والعجز، النهارده بقت مصر بتصدر الغاز، وبتبني أكبر مشروعات للطاقة المتجددة، وبتستعد تبقى حلقة الوصل بين آسيا وأفريقيا وأوروبا في مجال الطاقة.
مصر شغالة على خطة ضخمة علشان تحول نفسها لمركز طاقة إقليمي، وده مش كلام أو شعارات، دي خطوات حقيقية بدأت من فترة، وبتبان في الأرقام والمشروعات اللي بتتفتح واحدة ورا التانية.
أول حاجة، مصر عندها 14 ميناء بترولي بيتداول فيهم أكتر من 90 مليون طن سنويًا، وده بيديها ميزة كبيرة في تجارة وتداول المنتجات البترولية.
غير كده، عندنا خط أنابيب سوميد وقناة السويس اللي بيربطوا البحر الأحمر بالبحر المتوسط، يعني طريق استراتيجي عالمي بيوصل الطاقة من الشرق للغرب والعكس.
كمان عندنا ميزة محدش غيرنا في المنطقة عنده بالشكل ده، وهي محطات تسييل الغاز الطبيعي في إدكو ودمياط. المحطتين دول بيقدروا يصدروا حوالي 12 مليون طن سنويًا من الغاز الطبيعي المسال، وده اللي خلا الاتحاد الأوروبي يعتمد على مصر كمصدر آمن للطاقة بعد أزمة الغاز العالمية.
شبكة الغاز الطبيعي كمان من أكبر وأطول الشبكات في أفريقيا والشرق الأوسط، بأطوال بتزيد عن 8000 كيلومتر، ووزارة البترول شغالة على مد خطوط أنابيب جديدة متجهة ناحية الغرب علشان تربط بين الأسواق الأوروبية ومصادر الغاز في المنطقة.
والطاقة المتجددة كمان واخدة نصيب كبير من الخطة .. يعني مصر ناوية توصل لقدرة كهربائية حوالي 10 آلاف ميجا وات من الطاقة المتجددة بنهاية 2025، ومع حلول 2029 الرقم ده ممكن يوصل لـ 20 ألف ميجا وات من الطاقة المتجددة، غير 3600 ميجا وات من الطاقة النووية و2400 ميجا وات من الضخ والتخزين.
والتحول ده مش بيحصل كده وبس، لا.. وراه تحديث تشريعات وبنية تحتية ضخمة، علشان تسهّل دخول القطاع الخاص والمستثمرين الأجانب في مشاريع الطاقة النظيفة زي الطاقة الشمسية وطاقة الرياح.
وخليني اقولك ان المشروعات دي مش بس بتقلل الانبعاثات وتحقق رؤية مصر 2030، لكنها كمان بتخلق فرص عمل جديدة وبتزود النمو الاقتصادي.
وفي خطوات قوية كمان زي الربط الكهربائي بين مصر والسعودية والسودان، وده معناه إن مصر مش بس بتنتج طاقة لنفسها، لكن كمان بتصدرها وتربط شبكتها بدول تانية.
وفي النهاية، واضح إن مصر ماشية في طريق مدروس، وبتتحول من دولة كان عندها عجز في الطاقة، لدولة بتصدرها وتنافس على مركز قيادي في الشرق الأوسط.. والطريق لسه في بدايته، بس الخطوات سابقة والطموح كبير.
