قفزة 100% في عام واحد.. الأهرامات تتأهب للوصول إلى 5 ملايين زائر
اللي رايح الأهرامات قريب هيشوف مشهد مختلف تماما!. من أول الشوارع الجديدة، للمطاعم اللي بتفتح بالليل، لحد الممشى السياحي اللي بيربط المتحف المصري الكبير بالهضبة.. كل حاجة بتتغير بسرعة عشان مصر تستقبل ملايين الزوار من كل حتة في العالم.
والهدف من ده كله واضح طبعا: مضاعفة عدد السياح من 2.5 مليون لـ5 ملايين زائر في سنة واحدة!
من قلب الجيزة، واحدة من أعظم المناطق الأثرية في العالم بتتغير بالكامل.. الأهرامات مش بس بتتجمل، دي بتستعد تدخل مرحلة جديدة في تاريخها.
شركة أوراسكوم بيراميدز اللي ماسكة إدارة وتشغيل المنطقة، أعلنت إنها ناوية ترفع عدد الزوار من 2.5 مليون دلوقتي لـ5 ملايين سائح خلال السنة الجاية، يعني قفزة 100% في وقت قياسي!
بس الكلام مش مجرد وعود.. التطوير شغال على الأرض فعلا.
المنطقة بقت مليانة مشاريع ضخمة، منها مجمع مطاعم الملك خوفو اللي هيبدأ يشتغل بالليل الصيف الجاي، عشان يقدم تجربة جديدة للسياح في أجواء مميزة بين الأهرامات.
المجمع ده هيضم مطاعم عالمية ومناطق استراحة وأنشطة ليلية، وده هيخلي الناس تفضل تزور المكان لحد آخر اليوم بدل ما كانت الزيارة بتنتهي قبل الغروب
وفي نفس الوقت، وزارة النقل بتشتغل على قدم وساق لإنهاء محطة مترو الأهرامات ضمن الخط الرابع، واللي هتربط المنطقة بوسط القاهرة وحدائق الفسطاط، وده معناه إنك هتقدر تروح الأهرامات بالمترو في وقت قصير ومن غير زحمة.
كمان الدولة خلصت تقريبًا تطوير الشوارع والميادين اللي حوالين الأهرامات، واتعملت مواقف سيارات منظمة، ولافتات جديدة، وإنارة حديثة، وكل ده عشان المشهد يليق بمكان أثري عالمي زي ده.
واللي يروح هناك النهارده هيشوف فرق رهيب بين دلوقتي وزمان.
مش بس كده، نزلة السمان كمان ليها نصيب كبير من التطوير، لأن الحكومة بتشتغل على تحسين المرافق والنظافة وتجميل الشوارع، وكمان توعية الأهالي علشان الكل يكون جزء من التغيير اللي بيحصل.
الاهتمام كمان وصل لتفاصيل دقيقة جدًا زي تنسيق الواجهات، وزرع مساحات خضراء، وإنشاء ممشى سياحي جديد بيربط بين المتحف المصري الكبير والأهرامات، فيه استراحات ولوحات إرشادية ومسارات لذوي الهمم
يعني المنظر هناك هيبقى عالمي بكل معنى الكلمة
أما المتحف المصري الكبير، فهو جاهز يكون بوابة مصر الجديدة للسياحة
هيفتح رسميًا في 1 نوفمبر الجاي، وهيضم أكتر من 100 ألف قطعة أثرية، منهم المجموعة الكاملة لتوت عنخ آمون، وكمان تصميمه المعماري مبهر بيطل مباشرة على الأهرامات.
كل ده بيأكد إن الدولة ماشية بخطة مدروسة لتحويل منطقة الأهرامات لمقصد سياحي متكامل يربط بين الماضي والمستقبل، ويخلي كل زائر يعيش تجربة فريدة من نوعها.
ومن الواضح إن سنة 2026 هتكون بداية مرحلة جديدة في تاريخ السياحة المصرية.. والبطولة المرة دي من نصيب الأهرامات!
