فاكهة أغلى من اللحمة.. "البيبينو" الكيلو بـ1600 جنيه.. قالبة الدنيا في الأسواق المصرية!
تخيل كده إنك ماشي في السوق وبتتفرج على الفاكهة، وفجأة عينك تقع على حاجة غريبة شكلها ملفت.. لونها أصفر وعليها خطوط بنفسجية، وحجمها صغير كأنها لعبة!
تسأل البياع: "دي إيه يا عم الحاج؟" يرد عليك بكل فخر: "دي البيبينو يا باشا.. الكيلو بـ1600 جنيه!"
ساعتها أكيد هتقول في سرك: "ده كيلو اللحمة أرحم!" بس استنى شوية.. وخليني أحكيلك عن الفاكهة دي الأول، يمكن تغير رأيك!
فاكهة البيبينو مش جديدة على العالم، لكن بالنسبة لينا في مصر فهي اكتشاف لسه طازة، أصلها بيرجع لأمريكا الجنوبية، خصوصًا الدول اللي جوها استوائي، وهناك بيعتبروها من الفواكه الفاخرة جدًا، والغريب بقى إن البيبينو مش من عيلة المانجا ولا الكنتالوب زي ما شكلها ممكن يوحي، لأ دي من عيلة الباذنجان والطماطم والفلفل!
والشجرة ابتاعتها شكلها بسيط وصغير، ما بتعديش المتر ارتفاع، وأوقات بيحتاجوا يدعموها بخشب علشان تستحمل وزن الثمار اللي بتكون تقيلة إلى حد ما.
ومن كام سنة بدأ شوية مزارعين في مصر يجربوا يزرعوها، خصوصًا جوة الصوب الزراعية، لأنها بتحب الجو المعتدل اللي حرارته ما بين 18 و30 درجة.
الخبراء الزراعيين زي الدكتورة فاطمة مرسي من معهد المناخ الزراعي شجعوا الفكرة جدًا، وقالوا إن النبات ده بيتأقلم بسرعة مع أنواع مختلفة من الأراضي، حتى الأراضي الملحية. بس طبعا لما تتزرع في أرض خصبة وتصريفها كويس، المحصول بيبقى أفضل والطعم أحلى بكتير.
أما عن شكلها وطعمها، فالثمرة بتكون بيضاوية وصفراء وعليها خطوط بنفسجية جميلة. وطعمها بقى حكاية، بيكون مزيج كده غريب بين الشمام والكمثرى! يعني لما تاكلها هتحس إنك بتجرب حاجة فخمة ومختلفة جدًا عن أي فاكهة تانية.
واللي بيخليها مميزة كمان مش بس شكلها وطعمها، لكن فوائدها الصحية اللي خلتها تبقى حديث الناس.
وبحسب تقارير من قطاع الإرشاد الزراعي، البيبينو مليانة فيتامين سي بنسب عالية جدًا بتوصل من 30 لـ80 ملجم في الجرام الواحد!
وده غير إنها مضادة للكانسر وبتقلل الالتهابات، وبتساعد في ضبط السكر، وبتنشط المناعة.
وخليني اقولك ان الميزة الكبيرة بقى إن الشجرة بتطرح بسرعة جدًا، يعني بعد 3 شهور بس من الزراعة تقدر تبدأ في جمع المحصول.
مواسم زراعتها في مصر بتكون يا في مارس وأبريل أو في أغسطس وسبتمبر، وده بيخليها فاكهة مثالية للمزارعين اللي بيدوروا على محصول سريع.
لكن رغم كل ده، السعر لسه غالي جدًا 1600 جنيه للكيلو! وده طبيعي، لأن الفاكهة لسه جديدة جدًا ومفيش إنتاج كبير منها، فبعض المحلات بيبيعوها بالـ100 جرام بس.
إنما مع الوقت وانتشار زراعتها، الأسعار هتنزل أكيد، وساعتها ممكن نشوفها في كل بيت مصري، خصوصًا إن الناس بدأت تهتم أكتر بالأكل الصحي والفواكه المفيدة.
يعني المرة الجاية لو شفت البيبينو في السوق وما اشتريتهاش علشان السعر، على الأقل خد بالك إنك واقف قدام واحدة من أغلى وأندر الفواكه في مصر، يمكن النهارده غالية، بس بكرة تبقى فاكهة كل بيت!
