مصر تستهدف 145 مليار دولار من الصادرات بحلول 2030.. سر الجوافة الفرنسية السوداء.. عربية الأحلام بسعر 17 ألف جنيه
منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن خطة مصر لاستهداف 145 مليار دولار من الصادرات بحلول 2030
قال التقرير، إن مصر حاطة هدف ضخم، توصل بالصادرات لـ145 مليار دولار بحلول سنة 2030، والخطة دي مش كلام وخلاص، دي مبنية على وثيقة جديدة اسمها "وثيقة السياسة التجارية لمصر"، واللي أعلن عنها وزير الاستثمار والتجارة الخارجية حسن الخطيب.. لوثيقة دي جزء من رؤية مصر 2030، وهدفها تربط الاستثمار بالتجارة علشان نعتمد أكتر على التصنيع المحلي والتصدير بدل الاستيراد اللي بيستنزف العملة الصعبة.
وأضاف التقرير، أن الدولة عايزة تزود الإنتاج وتقلل العجز في الميزان التجاري وتدعم الجنيه المصري، يعني الخطة كمان مركزة على المنتجات اللي فيها قيمة مضافة، زي الصناعات اللي فيها تكنولوجيا وتصنيع حقيقي، علشان المنتج المصري يدخل بقوة في سلاسل القيمة العالمية.. كمان الوثيقة بتحط نظام يربط بين المستثمرين والتجارة، بحيث أي مستثمر يقدر يصدر منتجاته برا بسهولة من خلال اتفاقيات وتسهيلات قوية.. والسياسة دي مش بتعتمد على المنع أو القيود، بالعكس، هدفها تسهيل الإجراءات وتحفيز التصدير، وفي نفس الوقت بتحمي الصناعة المحلية من الإغراق وبتلتزم بقواعد منظمة التجارة العالمية.
في النهاية، الهدف مش مجرد رقم، الهدف إن مصر تبقى مركز إقليمي للتجارة والصناعة، ومنتجها ينافس عالميًا بجودة عالية.
منصات بانكير قدمت تقرير مختلف النهاردة عن سر الجوافة الفرنسية السوداء.
قال التقرير، إن ظهرت في مصر مؤخرًا فاكهة جديدة اسمها الجوافة الفرنسية، ولونها الغريب لفت أنظار الناس على السوشيال ميديا، بعد ما اتنشرت صورها بلونها الأسود اللامع وحجمها الصغير اللي بيشبه العنب.. الفاكهة أصلها من الهند، لكنها اتطورت في فرنسا بشكل طبيعي لحد ما بقت من أندر الفواكه في العالم، وبدأت توصل للأسواق المصرية بأسعار بتبدأ من 250 جنيه وبتوصل لـ400 جنيه للكيلو.
وأوضح تقرير بانكير، أن الجوافة دي بتتميز إن طعمها مزيج بين الليمون والأناناس، وسكرها خفيف، وكمان مفيهاش بذور زي الجوافة البلدي، ومن جوه لونها أحمر وردي، أما من برة أسود غامق بيلمع، وده اللي خلاها تتحول لرمز للفخامة والاختلاف، والشجرة اللي بتطلعها مش كبيرة، بس عمرها ممكن يوصل لمية سنة، وسهل تتزرع في البيت أو فوق السطح لأنها مش محتاجة رعاية خاصة.
وكشف التقرير، أن الجوافة دي كمان قيمتها الغذائية عالية جدًا، فيها فيتامين "سي" أكتر من الجوافة العادية بـ10 مرات، وأربع أضعاف اللي في البرتقال، وده بيخليها من أقوى الفواكه اللي بتقوي المناعة وتحافظ على الصحة.
وحدة أبحاث بانكير قدمت تقرير خاص النهاردة عن عربية الأحلام بسعر 17 ألف جنيه
كشف التقرير، أنه ظهر في مدينة بيلا بمحافظة كفر الشيخ، قدر الشاب محمد عبد المولى، عنده 34 سنة، يحقق حلمه بطريقته الخاصة، محمد شغال ميكانيكي تبريد وتكييف، وكان بيحلم يشتري توكتوك علشان يزود دخله، لكن لما عرف إن سعره وصل لأكتر من 100 ألف جنيه، قرر ما يقفش عند الصدمة ويلاقي حل بإيده.
وأكد التقرير، أن محمد استخدم خبرته في الميكانيكا، وجمع حديد وخردة وفيبر وموتور موتوسيكل قديم، وبدأ يصنع عربية من الصفر في ورشته الصغيرة، واشتغل عليها 60 يوم متواصل من الصبح لحد نص الليل، لحد ما طلع عربية بثلاث عجلات، شكلها شيك جدًا، وأقرب لعربية صغيرة مش توكتوك..كمان العربية فيها 5 كراسي، حزام أمان، عداد سرعة، وسرعتها بتوصل لـ80 كيلو في الساعة، وده كله بتكلفة حوالي 17 ألف جنيه بس!
وأشار التقرير إلى أن النتيجة كانت مبهرة، والناس في بيلا كلها اتكلمت عنه، وبدأت تصور عربيته اللي سماها البعض “عربية الأحلام"، ومحمد قال إن هدفه مش بس يعمل عربية لنفسه، لكن يثبت إن أي شاب ممكن يبدأ مشروع بإمكانياته المحدودة، لو فكر واشتغل بجد.
وأوضح التقرير، أن اللي عمله محمد بقى رمز للعزيمة والإبداع، لأنه قدر يحول أدوات بسيطة لحلم حقيقي، وقدم رسالة قوية لكل الشباب إن النجاح مش محتاج رأس مال كبير ولا ظروف مثالية، محتاج بس فكرة وإرادة وشغل بإيدك.
