"الذهب الأبيض".. لماذا حظرت مصر تصدير الرمال البيضاء؟ إزاي بتدخل في صناعات بالمليارات وإيه علاقة الصين والإمارات!
لما تسمع كلمة "رمال" طبيعي ييجي في بالك الشواطئ والرحلات الصيفية.. لكن في نوع معين اسمه الرمال البيضاء بيعتبر من أغلى وأهم الثروات الطبيعية في العالم.
مصر واحدة من الدول اللي عندها احتياطي كبير من النوع ده، علشان كده قرار وزير الاستثمار والتجارة الخارجية باستمرار حظر تصدير خام الرمال البيضاء فتح باب نقاش واسع: ليه الرمال دي مهمة للدرجة دي؟ وإزاي ممكن تتحول لمصدر عملة صعبة وصناعة ضخمة بدل ما تتصدر كخام يتباع برخص التراب؟
الرمال البيضاء مختلفة تمامًا عن الرمال الصفراء اللي بنشوفها في الصحاري والشواطئ، أهم ميزة فيها إنها نقية جدًا، فيها حوالي 95% من ثاني أكسيد السيليكون، ونسبة قليلة جدًا من أكسيد الحديد لا تتجاوز 0.6% .. والنقاء ده بيخليها أساس صناعات متقدمة جدًا، وصعب تعويضها بأي بديل.
وخليني اقولك ان أول وأشهر استخدام ليها هو الزجاج، وكل ما تكون الرمال أنقى، كل ما يطلع المنتج الزجاجي أجود وأنقى في الرؤية، وده مش بس بيشمل زجاج المباني والسيارات، لكن كمان العبوات الزجاجية، الأدوات المنزلية، وأحدث أنواع الزجاج المستخدم في الإلكترونيات.
على سبيل المثال، شاشات التلفزيون والكمبيوتر والموبايلات محتاجة رمال بيضاء عالية الجودة علشان تدينا دقة ورؤية واضحة.
دي كمان بتدخل في صناعات متقدمة جدًا زي الأدوات العلمية وأنابيب الاختبار والمصابيح المتوهجة، يعني ممكن نقول إنها مش بس مرتبطة بحاجات استهلاكية، لكن كمان بالعلم والتكنولوجيا.
ولو بصينا على الجانب الرياضي، هنلاقي إن الرمال البيضاء بتستخدم في ملاعب الجولف والملاعب الاصطناعية، وده لأن طبيعتها بتساعد على تهوية جذور النباتات وتخلي المساحات الخضراء دايمًا في حالة نضارة.
ومش بس كده، دي لها دور مهم جدًا في تنقية مياه الشرب ومعالجة مياه الصرف الصحي، لأنها بتدخل في تصنيع الفلاتر، وده بيخليها جزء أساسي من الصناعات المرتبطة بالحياة اليومية لكل إنسان.
ومن الاستخدامات اللي ممكن تفاجئ ناس كتير إن الرمال البيضاء بتدخل في عمليات استخراج النفط والغاز الطبيعي، والشركات العملاقة بتستخدمها عن طريق ضخها في آبار الحفر العميقة علشان تزود معدل تدفق البترول وتخليه أنقى، يعني ممكن نقول إن الرمال دي ليها علاقة مباشرة بأكبر مصدر للطاقة في العالم.
أما في مجال البناء والتشييد، فالرمال البيضاء تعتبر عنصر لا غنى عنه، بتدخل في الدهانات علشان تضيف لمعان ومتانة وتخلي الطلاء مقاوم للتشقق، وكمان موجودة في صناعة السيراميك، وبلاط الأرضيات والجدران، والأدوات الصحية، وحتى الطوب الرملي.
وطبعا كل ده بيأكد إن الرمال البيضاء مش مجرد مورد طبيعي عادي، لكنها ثروة استراتيجية لو تم استغلالها صح، وبدل ما نصدرها كخام ونخسر قيمتها الحقيقية، مصر ممكن تحولها لمنتجات صناعية متقدمة وتصدرها بضعف أضعاف القيمة، وده بالضبط السبب اللي خلى الحكومة تمنع تصديرها خام، علشان تتحول لركيزة من ركائز الصناعة المحلية وتبقى مصدر دخل وعملة صعبة للبلد.
اللافت كمان إن دول عملاقة زي الصين والهند بتستورد ملايين الأطنان من الرمال البيضاء سنويًا علشان تغطي احتياجاتها من صناعات التكنولوجيا والبناء والطاقة، حتى الإمارات استوردت كميات كبيرة لاستخدامها في مشاريع عمرانية ضخمة، وده بيوضح إن العالم كله بيجري ورا الثروة دي، ومصر عندها فرصة ذهبية تبقى لاعب رئيسي في السوق العالمي لو ركزت على التصنيع بدل التصدير الخام.
