هيوفر فرص عمل وهيولد أكتر من 3 مليون ميجاوات ساعة كهرباء نظيفة.. أكبر مشروع للطاقة النظيفة في افريقيا
وفر اكتر من 4000 فرص عمل وهيولد اكتر من 3000000 ميجاوات ساعة كهرباء نظيفة وهيخلينا نستغل كل جزء من الشمس.. مشروع تاريخي جديد بيحصل في مصر هيحافظ على البيئة وهيوفر ملايين الدولارات للبلد.. يا ترى إيه حكاية المشروع ده واحنا كمواطنين هنستافد منه ازاي وليه فيه اهتمام كبير بيه.. تعالوا نعرف ايه الحكاية.
المشروع ده اسمه محطة أبيدوس 2 للطاقة الشمسية وتخزين الكهرباء.. واحد من اكبر المشروعات اللي اتعملت في افريقيا وبيمثل نقلة حقيقية في طريقة توليد الكهرباء في مصر المشروع قايم على فكرة واضحة وهي ان الطاقة الشمسية لازم تشتغل بكفاءة ولازم يبقى معاها تخزين عشان تفضل مفيدة طول الوقت مش بس وقت سطوع الشمس.
المبهر بجد إن المحطة قدرتها 1000 ميغاواط طاقة شمسية وده رقم ضخم جدا ومعاها نظام تخزين بالبطاريات بسعة 600 ميغاواط ساعة وده معناه ان الكهرباء اللي بتتولد في وقت النهار بتتخزن وتستخدم وقت الليل او وقت زيادة الاستهلاك وده بيدي الشبكة استقرار ويقلل الضغط في اوقات الذروة.
المشروع يتنفذ في محافظة اسوان وده اختيار مبني على ارقام لان اسوان من اعلى مناطق مصر من حيث الاشعاع الشمسي وده بيرفع كفاءة التشغيل وبيخلي كل لوح شمسي يطلع اقصى طاقة ممكنة وده معناه انتاج اعلى وتكلفة اقل على المدى الطويل.. طيب المشروع ده مهم ليه واواي وهنستفاد منه.
من جهة الاستفادة فهد معايا يا سيدي. من ناحية العائد المباشر المشروع هيولد اكتر من 3000000 ميغاواط ساعة كهرباء نظيفة كل سنة والكمية دي تكفي اكتر من 500 الف اسرة وده بيوضح حجم المشروع وتأثيره الحقيقي على حياة الناس وتقليل الاعتماد على مصادر تقليدية مكلفة.
اما بيئيا المشروع هيخفض انبعاثات ثاني اكسيد الكربون بحوالي 1.6 مليون طن سنويا وده رقم كبير وبيخدم خطط الدولة في التحول للطاقة النظيفة وتقليل التلوث والحفاظ على الموارد.
كمان اقتصاديا المشروع وفر اكتر من 4000 فرصة عمل في مرحلة الانشاء بنسبة عمالة مصرية اكتر من 95 في المية وده دعم مباشر لسوق العمل ونقل خبرات جديدة خصوصا ان المشروع شراكة بين اميا باور بنسبة 60 في المية وكيودن اليابانية بنسبة 40 في المية وبتمويل دولي يوصل لحوالي 570 مليون دولار.
وعلى فكرة المشروع هيبدأ تشغيله التجاري في يونيو 2026 وساعتها هيبقى اكبر مشروع في افريقيا بيجمع بين التوليد الشمسي والتخزين في موقع واحد وده بيأكد ان محطة أبيدوس 2 مش مشروع عادي ده مشروع مبني على ارقام واضحة وتأثير مباشر واستثمار طويل الاجل في كهرباء مستقرة واقتصاد اقوى ومستقبل طاقة افضل لمصر.
