الزيادة الأخيرة.. مفاجأة من الحكومة حول أسعار البنزين والسولار
الكل مستني تأكيدات الحكومة حول زيادة أسعار البنزين والسولار.. ويا ترى الزيادات هتستمر ولا خلاص قربت تنتهي؟
الدكتور مصطفى مدبولي، رئيس الوزراء، قال في لقاء مع رؤساء التحرير إن الزيادة اللي جاية في أسعار المواد البترولية – والمتوقعة في شهر أكتوبر اللي جاي – ممكن تبقى الأخيرة.
مدبولي أوضح إنه قعد النهارده مع وزير البترول وراجعوا أرقام القطاع، وأكد إن خطة الإصلاح ماشيه بخطوات واضحة.
مدبولي قال إن الزيادة المتوقع لها في أكتوبر اللي جاي، إذا استمرت المعدلات بالطريقة دي في الأسعار، ممكن هي الزيادة الأخيرة.
وقال كمان بعد نهاية الزيادة دي، هيفضل دعم لسعر السولار، واللي الحكومة هتحاول تغطيه من أسعار بقية المنتجات، واللي هتتباع بزيادة شوية عن تكلفتها عشان يعوضوا بعض.
رئيس الحكومة قال كمان أن السولار مشكلته إنه ييدخل ويضرب في التضخم، وداخل في مشتقات وأعمال كثيرة، منها الطرمبة بتاعة الفلاح البسيط اللي بتشتغل بالسولار، الونش، وعربيات النقل، وعشان كده أي زيادات للسولار بنبقى عارفين أن ليها تداعيات على التضخم.
مدبولي كمان طمّن إن التوقعات العالمية حالياً بتشير لاستقرار في أسعار البنزين والغاز، وإنه بعد الزيادة دي هيكون فيه آلية تسعير تلقائي.. يعني الأسعار ممكن تنزل أو تطلع بس بشكل بسيط وملحوظ.
