بعد نصيحة ساويرس.. لو عايز تشتري شقة أو عقار شوف ايه اللي بيحصل في السوق
في علاقة مباشرة بين أسعار العقارات في مصر والدولار.. وده كان اسباب الارتفاع الغير طبيعي لأسعار العقارات في مصر.. ياتري هل أسعار العقارات في مصر هتنخفض الفترة اللي جاية مع انخفاض سعر صرف الدولار .. والانخفاض هيوصل لكام
من كام ساعة كان في تصريحات مهمة جدا لرجل الأعمال نجيب ساويرس واللي كانت بمثابة ضربة كبيرة لسوق العقارات في مصر واللي اتكلم فيها فيها عن مستقبل الاستثمار في العقارات، والخطط والعروض اللي بيقدمها المطورين العقاريين لبناء العقارات والشقق السكنية قدام العملاء.
حاجة مهمة جدا من التصريحات اللي اتكلم عليها رجل الأعمال نجيب ساويرس عن انظمة السداد الطويلة اللي بتترواح من 12 لحد 15 سنة واللي بيقدمها المطورين العقاريين للعملاء بهدف بيع الوحدات السكنية للمواطنين، وقال عنها انها بتؤدي لوجود صعوبات كتيرة علي المطورين، وان في أنظمة كتيرة ممكن تتناسب مع المواطنين علي حسبهم دخلهم، لكن النظام المتبع من المطورون العقاريين علي فترات سداد طويلة بفوائد بتوصل لـ 25%، ده خلي أكثر من 70% من سعر الوحدات عبارة عن فوايد للأقساط وبالتالي المطورون مش قادرين علي العمل في ظل الظروف والمنظومة الحالية.
التصريحات اللي اتكلم عليها تجيب ساويرس عن سوق العقارات في مصر عملت أزمة كبيرة خصوصا أن سعر صرف الدولار في مصر في النازل وسعر صرف الجنية المصري في الطالع، وأغلب أسعار مواد البناء بدأت يتحرك للهبوط.
طيب هل هيكون في تخفيض جديد في أسعار العقارات في مصر مع انخفاض أسعار مواد البناء بسبب انخفاض أسعار صرف الدولار؟.
الانخفاض اللي حصل في أسعار صرف الدولار خلي نسبة كبيرة من أسعار مواد البناء تنخفض يعني مثلا سعر طن الحديد اللي كان معدي 45 الف جنية دلوقتي سعره نزل لأقل من 38 الف جنيه والاسمنت سعره نزل بأرقام معقولة جدا والطوب نفس الكلام، وكان المفروض الانخفاض ده ينعكس علي أسعار العقارات وتنخفض هيا كمان لكن ده محصلش وهنا السؤال المهم ليه أسعار الشقق والعقارات في مصر اسعارها لسه مرتفعة.
علشان تفهم الأزمة لازم تعرف ان اللي بيبع شقة النهاردة مش هيبص بس على سعر الحديد والأسمنت ولا هو شارى الأرض من سنة بسعر كان ولا دفع أجرة للعمال اد اية ولا اشتري مواد بناء بكام، هو بيبص علي سعر السوق، وبيقول جاري باع السنة اللي فاتت بمليون يبقي انا هيبع السنة دي بمليون ونصف أو 2 مليون، خصوصا أن أغلب اللي اشتري عقارات كان الهدف عندهم هو تخزين العقار وإعادة بيعه وتحقيق ربح كبير منه خصوصا أنه تحول لاستثمار، لكن في حالة لو الدولار فضل مستقر ومواد البناء استمرت في الانخفاض وفي ظل الانخفاض اللي موجود حاليا في الشراء، فده هيجبر اصحاب العقارات انهم يخفضوا الأسعار علشان يبيع العقار اللي متخزن عنده خاصة أن السوق مليان عروض ومفيش اقبال بالشكل الكبير علي الشراء .
لو ناوي تشتري لازم تدور بشكل كويس قوي، ولو مش مستعجل، استنى شوية، السوق داخل على مرحلة غربلة وهتشوف حاجات نازلة وحدها،وسيبك من اللي يقولك الفرصة مش هتيجي تاني، ولا اللي يخوفك إن كل يوم السعر بيزيد، ولازم تكون عارف ان اللي بيخوفك ده عايز يبيعلك، مش بيخاف على مصلحتك.
