مفاجآت المركزي بعد خفض الفايدة.. إيه اللي هيحصل للدهب والدولار بعد قرار “الخميس الحاسم”
إيه اللي بيحصل في كواليس السوق بعد قرار البنك المركزي بخفض الفايدة 2%؟ وهل فيه خطة سرية بيتم التجهيز ليها.. فيما يخص الدولار؟ وإيه علاقة كل ده بمستقبل شهادات الاستثمار.. وفلوسك اللي في البنوك؟ وهل الدهب دلوقتي هو أفضل مكان تحط فيه فلوسك؟
من فترة قريبة كانت الفايدة العالية هي الوسيلة الأساسية لجذب الدولار.. علشان نلم "الفلوس السخنة" من المستثمرين الأجانب.. لكن دلوقتي.. البنك المركزي بيقول إن اللعبة اتغيرت.. والقرار الأخير بخفض الفايدة 2% .. هو إشارة واضحة جداً.. إن البنك المركزي واثق في قدرته على السيطرة على سعر الدولار.. ومبقاش محتاج الفايدة العالية علشان يجذب الدولار.
طب إيه الخطة الجديدة؟
الخطة ببساطة.. هي تحويل فلوس المصريين من "الودايع والشهادات" اللي ملهاش أي عائد على الاقتصاد الحقيقي.. لمشاريع واستثمارات فعالة.
خفض الفايدة بيخلي العائد على الشهادات أقل.. وده بيشجع الناس إنها تدور على استثمارات تانية.. زي البورصة.. أو العقارات.. أو حتى تبدأ مشاريع صغيرة ومتوسطة.. وده في النهاية بيصب في مصلحة الاقتصاد كله.
كمان الفايدة الأقل بتشجع الشركات والمستثمرين على إنهم ياخدوا قروض.. ويفتحوا مصانع جديدة.. أو يوسعوا مشاريعهم.. وده بيوفر فرص عمل للشباب..
الموضوع ده ليه تأثير مباشر على أسعار السلع والخدمات.. لإن الفايدة الأقل بتخلي تكلفة الإنتاج على المصانع أقل.. وده في النهاية المفروض ينعكس على أسعار المنتجات.
أما الدهب.. فهو بيعتبر ملاذ آمن.. لكن مع تغيرات سياسات البنك المركزي.. ممكن نشوف اتجاه جديد للناس.. إما إنها تفضل الدهب.. أو تتجه لاستثمارات تانية زي العقارات والأسهم.
المؤكد ان قرار خفض الفايدة خطوة جريئة جداً.. البنك المركزي بيخاطر بيها.. في محاولة منه علشان يغير اتجاه الاقتصاد المصري كله.. من الاعتماد على الديون والودايع.. للاعتماد على الإنتاج والاستثمار الحقيقي.
