كيفية استخدام تطبيق "طوالي" لدفع تذكرة أتوبيسات النقل العام.. السعر وطريقة الشحن
هيئة النقل العام بدأت تطبيق منظومة دفع إلكتروني جديدة اسمها "طوالي"، تقدر من خلالها تدفع تذكرة الأتوبيس بالكارت الذكي أو بالموبايل، وده اختيارى مش إجباري علشان يناسب كل الناس.
المرحلة الأولى اشتغلت بالفعل على حوالي 300 أتوبيس في القاهرة الكبرى، وكل أتوبيس فيهم عليه جهازين دفع، واحد قدام وواحد ورا، علشان الركوب والنزول يبقى أسهل ومن غير زحمة.
كارت طوالي بتشتريه أول مرة بـ85 جنيه من غير رصيد، وبعد كده تشحنه بالقيمة اللي تناسبك، وأقل شحن 50 جنيه، والكارت صلاحيته سنتين، ولو ما اتشحنش أو ما استخدمش سنة بيتوقف تلقائي.
الشحن متاح من منافذ هيئة النقل العام، والجراجات، والمحطات الرئيسية، وكمان إلكترونيًا من خلال تطبيق طوالي على الموبايل باستخدام كروت فيزا أو ماستر كارد أو المحافظ الإلكترونية حسب المتاح.
كل اللي عليك تحمل التطبيق من جوجل بلاي أو آب ستور، تسجل بياناتك، وتشحن رصيدك وتستخدمه علطول.
وقت الركوب بتحط الكارت أو الموبايل على جهاز الدفع، ويتخصم سعر التذكرة حسب المسافة ونوع الأتوبيس، والأسعار بتبدأ من 8 جنيه لحد 18 جنيه.
الخطة إن المنظومة تغطي 1800 أتوبيس لحد سنة 2027، علشان تسهل على الركاب، تقلل الزحمة، وتدخل النقل العام في مرحلة جديدة من الدفع الذكي.
