أزمة كاش في ماكينات البنوك.. إيه اللي بيحصل؟
في الأيام اللي فاتت، ناس كتير اشتكت إنها مش عارفة تسحب فلوس من ماكينات الصراف الآلي سواء بليل أو نهار، والرسالة واحدة: "لا توجد سيولة كافية".
الأزمة ظهرت أكتر في ماكينات البنوك الخاصة، وده خلى ناس كتير تروح لماكينات البنوك الحكومية الكبيرة زي الأهلي ومصر، فزادت الزحمة والطوابير.
طيب إيه السبب؟
ببساطة، معدلات السحب زادت بشكل كبير مع دخول شهر رمضان، اللي معروف إنه من أكتر شهور السنة صرفًا، غير كمان إجازات نصف العام وصرف المرتبات والمعاشات في بداية الشهر.
ناس كتير رجعت تعتمد على الكاش بدل الدفع الإلكتروني، فالسحب بقى أسرع من تغذية الماكينات.
كمان شركات تغذية الأموال نفسها اتضغطت، لأن الماكينات بتفضى بسرعة، وبتحتاج تمر عليها أكتر من مرة في اليوم.
ورغم إن في حوالي 30 ألف ماكينة صراف آلي في مصر، لكن الضغط المفاجئ خلّى الأزمة تظهر في مناطق كتير زي فيصل، الهرم، والمطرية.
يعني الموضوع مش نقص فلوس في البنوك، لكن سحب عالي + اعتماد أكبر على الكاش وده اللي خلى الماكينات فاضية.
