ليه المواطن المصري مش بيحس بالتحسن الاقتصادي رغم تحسن مؤشرات الاقتصاد؟.. شوف التفاصيل
في سؤال بيشغل ناس كتير، يا ترى ليه الحكومة بتقول إن الاقتصاد بيتحسن بس المواطن مش حاسس بأي فرق، ولا الأسعار نزلت، طب هل فعلا مؤشرات الاقتصاد بتتحسن؟
في الفترة الأخيرة، مؤشرات الاقتصاد المصري الكلي ارتفعت وده مفترض ينعكس بشكل إيجابي على معيشة المواطن، طب يعني إيه الكلام ده؟
يعني ممكن الأرقام تقول إن الاقتصاد ماشي تمام بس المواطن نفسه لسه بيعاني، والاقتصاد ممكن يبقى فعلا بيحقق أرقام حلوة زي مثلا زيادة الاحتياطي النقدي واستقرار سعر الصرف وارتفاع معدل النمو ورجوع الاستثمارات الأجنبية، وكل دي حاجات كويسة جدا ومبشرة للمستقبل.
لكن، في نفس الوقت، في حاجات تانية بتأثر على جيب المواطن بشكل مباشر، زي التضخم وارتفاع الأسعار واللي بيلتهم أي تحسن ممكن يحصل في المرتب أو القوة الشرائية.
ونقدر نقول، ان المعادلة صعبة، لأن عشان التحسن الحقيقي يوصل للناس ومحتاج وقت ومحتاج صبر ومحتاج إن الحكومة تشتغل مش بس على المؤشرات، لكن كمان على ضبط الأسعار وتحسين دخول الناس وتوفير فرص عمل حقيقية.
بمعنى أوضح الاقتصاد لو بيتحسن من فوق، لازم كمان التحسن يوصل لجيوب الناس وبيوتهم وأكلهم وشربهم، بس المشكلة إن وتيرة الإصلاحات دايما أبطأ من وتيرة الغلاء، يعني الأسعار بتطلع بسرعة لكن التحسن بياخد وقت علشان يظهر في حياة المواطن.
وعشان كده، مش كفاية إن الحكومة تقول الاقتصاد تمام، فالمواطن عايز يحس وهو بيشتري ووهو بيدفع وهو بيربي أولاده، مش يحس بالأرقام يحس بالراحة.
والخلاصة، ان الاقتصاد ماشي في اتجاه صح لكن الطريق طويل والمطلوب إن كل إصلاح اقتصادي يكون ليه نصيب في حياة الناس، مش بس في التقارير، والمعادلة الصعبة دي محتاجة توازن بين النمو والعدالة بين التحسن على الورق والتحسن اللي بنعيشه بجد.
