مصر تبحث عن كنز الـ100 ألف كيلو في البحر المتوسط.. إيه الحكاية؟
هو ليه مصر بقالها كام سنة مركزة على الغاز الطبيعي بالذات؟، يعني إيه مسح السيزمي؟ وبيفيدنا بإيه؟، وهل ممكن نلاقي "حقل ظهر جديد" في البحر المتوسط؟.. وتفتكر الغاز اللي في البحر ده ممكن يخلينا نعيش من غير ما نستورد طاقة؟
تفتكر لو قلتلك إن في كنز متداري في أعماق البحر، والدولة قررت تنزل تدور عليه، هتصدق؟.. مش كنز دهب ولا ألماس... ده كنز تاني خالص، اسمه الغاز الطبيعي، وده بالظبط اللي بتعمله مصر اليومين دول.
خلينا نحكيلك القصة من الأول
مصر أعلنت عن مناقصة عالمية علشان تعمل مسح سيزمي ثلاثي الأبعاد علشان يمسحوا حوالي 100 ألف كيلومتر مربع في شرق البحر المتوسط، وده ببساطة يعني إنها بتقول لشركات التنقيب الكبيرة، يلا يا جماعة، اللي شايف نفسه قدها، ييجي يورينا شطارته.. المسح ده مش مسح عادي، ده بيتم بأحدث التقنيات عشان يشوفوا الأعماق تحت البحر فيها إيه؟ غاز؟ بترول؟ ولا مفاجآت تانية؟.. كل ده باستخدام تكنولوجيا حديثة زي الرادار والسونار، وكأنهم بيصوروا الأرض من جوه.
والهدف منها، عشان نشوف احتياطيات الغاز في المنطقة دي بشكل دقيق، ونعرف فين ممكن نلاقي "الضربة الكبيرة" الجاية.. المفاجأة بقى إن مصر مش هتدفع ولا جنيه من جيبها في الموضوع ده.. الشركات اللي هتعمل المسح هي اللي هتلم الفلوس من شركات التنقيب اللي عايزة تشتري البيانات بعدين.
يعني الدولة بتدور على الغاز من غير ما تشيل التكلفة، شطارة ولا مش شطارة؟
تعالى نبص شوية على الأرقام.. أكتر من 62% من إنتاج الغاز الطبيعي في مصر بييجي من شرق البحر المتوسط، وراه دلتا النيل بنسبة 19%، وبعد كده الصحراء الغربية بنسبة 18%، وفيه حوالي 20 شركة بتشتغل في المناطق دي دلوقتي، يعني ببساطة، الشرق هو القلب النابض للغاز في مصر.
طيب إزاي هيتم المسح ده؟
المسح مش هيتم دفعة واحدة، لأ، ده هيتقسم لمناطق صغيرة، وشركات مختلفة تشتغل عليها في نفس الوقت، والخطة دي معمولة علشان نسرع عملية البحث والتنقيب.
طب وده يفيدنا بإيه؟
المسح ده هيفتح الباب قدام شركات صغيرة ومتوسطة تشتغل في المنطقة، خصوصًا إن تكلفة المسح غالية جدًا، ودي فرصة ليهم ياخدوا بيانات جاهزة ويوفروا حوالي 60% من التكلفة.. يعني الشركات تكسب، ومصر تكسب، والجميع يشتغل.
البحر الأحمر كان البداية، طب إيه اللي حصل؟.. على فكرة، مصر مش أول مرة تعمل كده، لأنها في 2017 عملنا نفس النظام مع شركة "شلمبرجير" العالمية في البحر الأحمر وخليج السويس، وعملوا مسح وقدّموا حزم بيانات للشركات اللي عايزة تنقّب عن الغاز والبترول هناك.
ومعروفة أن شرق المتوسط بيساوي منجم غاز، لأن المنطقة دي فيها كنوز بجد، مش بس حقل ظهر اللي يعتبر أكبر حقل غاز في مصر، ده لوحده فيه حوالي 30 تريليون قدم مكعب من الغاز، وبيتم تشغيله من شركة "إيني" الإيطالية.
الخلاصة؟.. أن مصر مش ماشية بس في طريق التنقيب، دي ماشية بعقل وذكاء... بتجمع بيانات، وتعرضها، وتخلي اللي عايز يشتغل يدفع، وكل ده علشان تقدر تلبي احتياجات السوق المحلي، وترجع تصدر الغاز بقوة زي زمان ويمكن أكتر.
