مشروع صيني جديد بقناة السويس يغير خريطة قطاع المنسوجات في مصر.. إيه اللي بيحصل؟
يا ترى إيه اللي بيحصل في قناة السويس، وليه الكلام زاد فجأة عن استثمارات صينية في مصر، وإيه طبيعة الاستثمارات الجديدة اليومين دوم؟
في الحقيقة، في مشروع صيني جديد هيغير شكل قطاع المنسوجات بالكامل، وهيخلي مصر واحدة من أهم المحطات في الصناعة دي على مستوى العالم، المشروع ده بيحصل في المنطقة الاقتصادية لقناة السويس.
ومن كام يوم، استقبل وليد جمال الدين، رئيس الهيئة العامة للمنطقة الاقتصادية لقناة السويس، وفد رسمي من الصين، تحديدا من اتحاد الصناعة والتجارة في مقاطعة "شيجيانج" الصينية، وهى واحدة من أكبر المراكز الصناعية في العالم، والزيارة مش عادية خالص، لأن فيها مفاوضات على مشروع جديد عملاق في قطاع المنسوجات، وده جزء من خطة أوسع لجذب الاستثمارات الصينية في المنطقة.
وبردو المنطقة الاقتصادية لقناة السويس بقت فعلا مغرية لأي مستثمر أجنبي، اان فيها 6 موانى ضخمة على البحر الأحمر وكمان البحر المتوسط، وهي متكاملة مع 4 مناطق صناعية جاهزة بالكامل، وفي بنية تحتية على أعلى مستوى، وكل ذه غير الميزة الأهم وهي سهولة التصدير لأي حتة في العالم بسبب الاتفاقيات التجارية الحرة اللي مصر داخلاها.
طيب المشروع الجديد ده بيعمل إيه؟
ده واحد من 6 مشروعات تم الاتفاق عليهم خلال زيارة مصر للصين الشهر اللي فات، والمفاجأة إن معظمهم في قطاع المنسوجات والملابس الجاهزة. والمشروع اللي بنتكلم عليه النهاردة هيوفر فرص عمل جديدة ونقل تكنولوجيا حديثة في التصنيع وكمان رفع كفاءة الإنتاج المصري وهبساعد على دخول منتجاتنا لأسواق جديدة بسهولة، يعني ببساطة مش بس بيخدم على التصدير بس لا ده كمان بيرفع من جودة الصناعة المحلية وبيوفر منتجات بأسعار منافسة.
طيب ليه الصين بتستثمر هنا؟
لأن الصين شايفة إن المنطقة الاقتصادية لقناة السويس هي نقطة وصل استراتيجية بين آسيا، أوروبا، وأفريقيا، والموقع ده بيقلل عليهم التكلفة وبيسرّع التوزيع، ده غير إن مصر بقت بيئة جاذبة للاستثمار بعد الإصلاحات الاقتصادية اللي حصلت في السنين اللي فاتت سواء في تسهيل التراخيص أو دعم المناطق الصناعية أو حتى استقرار سعر الصرف.
طيب ده معناه إيه لينا كمصريين؟
معناه إن في شغل جاي في الطريق والصناعة المحلية هتتطور وممكن كمان الأسعار تقل لو جزء من الإنتاج ده اتباع محليًا، وده بيدخلنا على نقطة مهمة وهى ان الدولة بتراهن على جذب استثمارات إنتاجية مش بس استهلاكية عشان يحصل نمو حقيقي ومستدام.
والخلاصة هي ان مشروع المنسوجات الجديد مع الصين مش مجرد مصنع، ده بداية لتحوّل كبير في خريطة الصناعة المصرية وكل مشروع استثماري في قناة السويس بيقربنا أكتر من إننا نكون مركز صناعي ولوجيستي اقليمي وعالمي.
