بعد سنوات "النزيف الدولاري".. مصر تفجر قنبلة في وجه أزمة القمح والأدوية.. هل ينتهي عصر الاستيراد؟
مصر في الفترة الحالية بدأت استراتيجية جديدة لوقف نزيف سحب الدولار من البنوك، والخطة دي وصلت لوزارة الزراعة واللي بدأت يكون لها نصيب كبير من زيادة ايرادات مصر من الدخل الدولاري.. ياتري اية اللي بتعمله الوزارة علشان تزود ايرداتها.. واية فايدته علي الاقتصاد المصري.
مع مرور الوقت مصر بتتحول وقت بعد التاني لوحش كبير جدا محدش يقدر يقف قدامه، وخلال وقت قريب جدا هتحول لواحدة من اكبر الدول الصناعية في العالم في كل المجالات مش في مجال واحد بس، خصوصا أن في توجيهات رئاسية صدرت للحكومة بزيادة الإيرادات الدولارية من كل القطاعات اللي موجودة في الدولة، خصوصا أن السياسة اللي كانت الدولة بتعتمد عليها خلال السنين اللي فاتت بوجود باب واحد أو اتنين للدخل الدولاري للاسف اثبتت فشل زريع.
التكليفات الرئاسية بدأ كل وزير يترجمه في وزارته، واحدة من الوزارات المهمة اللي عليها جزء كبير من تنفيذ سياسة الحكومة بتقليل استنزاف الدولار وزيادة الصادرات الخارجية هيا وزارة الزراعة واللي هيا بتعد من أعلي الوزارات استهلاكا لموارد مصر الدولارية بسبب اعتمادها بشكل كبير في توفير غذاء المصريين من الحبوب خصوصا القمح علي الاستيراد الخارجي واللي الدولة بتستورد منه اكثر من 60% من احتياجات الشعب المصري علشان تنتج رغيف خبز المصريين.
استزاف وزارة الزراعة للدولار الأمريكي مش واقف علي القمح بس لا ده في جزء كبير منهم متعلق بتوفير الأدوية والأمصال البيطرية، واللي مصر علي مدار السنين اللي فاتت كانت بتستورد جزء كبير منه علشان توفر الرعاية اللازمة للثروة الحيوانية، وتأمن غذاء المصريين من اللحوم خصوصا أن مصر للاسف بتستورد نسبة من غذاء الشعب المصري من اللحوم من خلال الاعتماد علي الاستيراد.
طيب اية اللي بتعمله الدولة علشان توفر المبالغ الضخمة اللي كانت بتصرفها علي الأدوية والأمصال البيطرية ؟.
خلال السنين اللي فاتت مصر قدرت أنها تبني واحد من اكبر المجمعات اللي بتنتج الأدوية والأمصال البيطرية وهو مجمع مصانع ميفاك بمدينة الصالحية الجديدة في محافظة الشرقية واللي بيعد أكبر مجمع صناعي خاص بإنتاج اللقاحات البيطرية في مصر والشرق الأوسط وأفريقيا واللي مجهز باحدث الأجهزة والمختبرات لدعم جهود الدولة لتطوير اللقاحات الجديدة والمحسنة .
توجه الحكومة لدعم جهود توطين صناعة اللقاحات والأدوية جاية من اهتمام وعناية الدولة بالثروة الحيوانية والداجنة باعتبارها ركيزة أساسية لتحقيق الأمن الصحي والغذائي لمصر، ومستهدفات الحكومة من مجمع مصانع ميفاك مش بس سد النقص الملحلي لا ده كمان التصدير للاسواق الخارجية وتوفير مصدر دخل دولاري جديد لمصر من صناعة وتصدير الأدوية البيطرية.
مصر من خلال مجمع الأمصال والأدوية البيطرية قدرت تحتوي ازمات كبيرة كانت بتهدد الثروة الحيوانية في مصر زي مرض الحمى القلاعية، واحتواء انتشار الفيروسات خاصة فيروس إنفلونزا الطيور، ومكافحة مرض الجلد العقدي، وكان لها دور كبير في تقليل الاستيراد وتوفير العملة الصعبة والاعتماد على الإنتاج المحلي وتقليل استيراد اللقاحات من الخارج.
