هتسافر من إسكندرية لـ مطروح في ساعة ونص؟.. إيه اللي بيحصل في قطاع النقل
عمرك كنت تتخيل تسافر من مطروح لإسكندرية في أقل من ساعة ونص؟.. ولا كنت فاكر إن ده حلم بعيد؟.. وليه مصر بتركز دلوقتي على القطارات الكهربائية؟.. وهل الموضوع رفاهية؟ ولا خطة مستقبلية؟.. وهل المشروع ده هيوفرلك وقت وفلوس وراحة؟
الحكومة المصرية شغّالة حاليًا على تنفيذ الخط الأول من مشروع القطار الكهربائي السريع، اللي هيربط مرسى مطروح بالإسكندرية.. وده يعتبر خطوة قوية جدًا في تطوير منظومة النقل الحديثة في مصر.
الخط هيبدأ من مطروح، ويمر بـ الضبعة والعلمين الجديدة وبرج العرب ويوصل في الآخر لـ الإسكندرية، وده معناه إن الناس اللي رايحين الساحل أو راجعين منه، هيقدروا يسافروا بأمان، بسرعة، وراحة من غير زحمة ولا تعب الطريق.
طب السرعة قد إيه؟
احنا بنتكلم عن قطار سرعته توصل لـ 250 كم في الساعة!، يعني الرحلة من مطروح للإسكندرية اللي كانت ممكن تاخد 4 ساعات أو أكتر، هتبقى تقريبًا ساعة ونص أو أقل!
الهدف من المشروع؟.. هو ربط المحافظات الساحلية ببعضها بشكل أسرع وأكتر كفاءة وتقليل الاعتماد على العربيات والباصات على الطرق السريعة، وده هيقلل الحوادث، كمان هيكون خدمة للسياحة في مناطق زي مطروح والعلمين والساحل، وكمان تقليل استهلاك البنزين والوقود، لأنه قطار كهربائي صديق للبيئة.. مش بس وكده، ده المشروع بيتنفذ على أعلى مستوى، وبيتم بالتعاون مع شركات عالمية ومحلية، وبيستخدم تكنولوجيا حديثة جدًا في أنظمة الإشارات والتحكم.
أهم ميزة فيه بقى؟، أن القطار ده هيربط مصر ببعضها من الشرق للغرب، وبعدين يمتد لباقي الخطوط التانية اللي هتوصل لحد الصعيد والسويس والعين السخنة.
المشروع ده مش بس قطار، لأ.. دي منظومة لوجستية ضخمة بتربط السخنة، مرورًا بالعلمين ومطروح، لحد الإسكندرية.. وده جزء من توجيهات الرئيس عبد الفتاح السيسي علشان ننجز 7 ممرات لوجستية متكاملة تربط أماكن الإنتاج بالمواني، وتربط البحر الأحمر بالبحر المتوسط.
يعني تخيل كده، من ميناء السخنة لحد محطة مطروح مرورا بـ العاشر من رمضان، الروبيكي، بلبيس، لحد ميناء الإسكندرية الكبير، وكل ده متوصل بخط قطار سريع وكمان مواني جافة ومناطق لوجستية وطرق رئيسية.
وزير النقل كامل الوزير، عامل حسابه كمان عشان الأعطال، وقرر يعمل ورشة صيانة خفيفة في مطروح على مساحة ٢٥٦ ألف متر!.. مكان هيتم فيه صيانة القطارات بشكل دوري وشاف بنفسه الكباري والأنفاق اللي بتتعمل في الطريق، وكمان تابع المراحل اللي وصلت ليها أعمال تركيب القضبان والأنظمة الكهربائية.
الموضوع مش مجرد مشروع ومخلاص، ده فيه تحالف كبير شغال عليه ومن "سيمنز وأوراسكوم والمقاولون العرب، ولحد دلوقتي تم تسليمهم 387 كم من أصل 660 كم علشان يركبوا القضبان وأعمدة الكهرباء، وباقي القطاعات بيتم تسليمها تباعًا.
والمفاجأة بقى؟، أن أول قطار إقليمي وصل من ألمانيا فعلاً من شغل شركة سيمنز، ومن المتوقع وصول أول قطار سريع (فيلارو) في سبتمبر الجاي
الخلاصة، احنا مش بنتكلم بس عن وسيلة مواصلات، احنا بنتكلم عن ممر اقتصادي متكامل، بيربط الشرق بالغرب، وبيخدم السياحة، الصناعة، اللوجستيات، وكمان الناس البسيطة اللي عايزة تسافر بأمان وسرعة.
