مصر هتكسب إيه من بريكس؟ تعالى نقولك إيه اللي هيحصل
يا ترى ليه مصر شاركت في قمة "بريكس" اللي اتعملت في ريو دي جانيرو، وهل المشاركة دي هتفرق معانا اقتصاديا، ويعني ايه اصلا "بريكس"، وإزاي ممكن نكسب من وجودنا معاهم؟.
في الحقيقة، مصر انضمت لقمة "بريكس" في الفترة الأخيرة، وبريكس ده مش أي تجمع عادي، ده بقى في دول تقيلة زي الصين والهند، روسيا والبرازيل، ومعاهم كمان دول تانية انضمت مؤخرا زي مصر، وبيمثلوا تقريبا نص سكان العالمؤ
والاقتصاد بتاعهم حجمه حوالي 30 تريليون دولار.
ونقدر نقول، إن وجود مصر في القمة دي بيفتح لنا أبواب تعاون ضخمة جدا، خاصة في التجارة والاستثمار مع الدول دي، واللي إحنا أصلا بنستورد منهم حاجات مهمة زي الحبوب والزيوت وخامات التصنيع.
والأهم، إننا بدأنا نتعامل معاهم بالعملات المحلية زي اليوان الصيني والروبل الروسي، وده معناه تقليل اعتمادنا على الدولار اللي عامل لنا أزمة.، وده ممكن مع الوقت يرفع قيمة الجنيه بشكل كبير.
غير كل دذه، الهدف من مشاركتنا كمان هو تعزيز التجارة مع الصين، خاصة وإن الصين زودت تجارتها مع دول بريكس بنسبة 5.5% السنة الل فاتت، والبنك التابع للمجموعة وافق على تمويل مشاريع ب 35 مليار دولار، وعندنا في مصر، في منطقة صناعية صينية في محور قناة السويس، وفي منطقة روسية كمان، والهند كمان عايزة تدخل، وده كله بيخلق فرص استثمار وتشغيل وتصدير.
طب وبالنسبة للمنتج المصري؟
دي فرصة نطلع بيها بره، نغزو أسواق جديدة خاصة في دول التجمع اللي محتاجة سلع كتير بنقدر ننتجها.
طب، هل ده هيأثر على سعر الدولار؟
أكيد، لما نشتري خاماتنا باليوان والروبل بدل الدولار، الطلب على الدولار هيقل، وده ممكن يريح الضغط على الجنيه، ويدي فرصة نحافظ على استقرار السوق المحلي.
وبره الاقتصاد، في مكاسب تانية، زي إن مشاركتنا في بريكس هتساعد في الترويج للسياحة، خاصة مع افتتاح المتحف المصري الكبير وقرب الانتهاء من مدينة رأس الحكمة السياحية، وكل ده ممكن يجذب سياح كتير من دول بريكس اللي فيها شعوب ضخمة بتدور على وجهات جديدة.
والخلاصة هي إن نشاركة مصر في بريكس مش مجرد صورة حلوة وخلاص.ذ، لأ دي شراكة استراتيجية ممكن تساعدنا في تقليل الاعتماد على الدولار، وكمان زيادة التجارة مع دول قوية، ده غير جذب استثمارات جديدة، وبردو التوسع في تصدير المنتجات المصرية، بجانب دعم الصناعة والسياحة، يعني، إحنا بنقرب خطوة كمان من اقتصاد أقوى ومستقبل أفضل بكتير.
