إيه اللي هيحصل لأسعار الدهب والدولار يوم الأربعاء الجاي؟.. شوف التوقعات
يا ترى إيه اللي هيحصل للدهب والدولار يوم الاربع الجاي، وليه الناس بتتكلم عن اليوم ده، وليه المعدن الأصفر بيعلى والدولار بيغرق؟
في الحقيقة، الرئيس الأمريكي دونالد ترامب، ناوي يطبق رسوم جمركية ضخمة بداية من 1 أغسطس، بس قبلها بيومين وتحديدا يوم 9 يوليو، هيعلن التفاصيل النهائية.
وترامب قال بصراحة، "هنتعامل برسوم ما بين 10% ل70، والدول يا تدفع يا تخسر السوق الأمريكي، والقرارات دي مش هزار، دي هتقلب الموازين، مش بس في أمريكا لكن في العالم كله.
طب ده يفرق معانا في إيه؟
بص يا سيدي، الدولار ممكن يضعف، والدهب ممكن يطير،وده عشان الناس لما تحس إن في توتر اقتصادي عالمي، بتجري على الملاذ الآمن، والملاذ ده هو الدهب.
ونقدر نقول، إن كل مرة ترامب بيعلن فيها حاجات بالشكل ده، الدولار بيتأثر بالسلب، وفي المقابل الدهب بيكسب.
يعني إيه الكلام ده بالأرقام؟
الدهب دلوقتي عند 3333 دولار للأوقية، ومتوقع يكمل في الصعود لو تم تنفيذ الرسوم الجديدة، اما الدولار، فنزل تحت مستوى 97 نقطة لأول مرة من شهور.
وطبعا، ده بيفتح الباب لمزيد من الارتفاع في أسعار الدهب عالمياا،
لكن بالنسبة للدولار؟ ممكن يتراجع قدام باقي العملات.
طب ومصر؟
هنا بقى لازم نبص بزاويتين، لو الدولار العالمي ضعف، ده ممكن يضغط على الجنيه المصري بالإيجاب، بس ده مش مضمون، لإن في عوامل محلية أقوى بكتير، زي النقد الأجنبي، والتزامات مصر مع صندوق النقد، وكمان الواردات اللي بتعتمد على الدولار.
أما بالنسبة لأسعار الدهب في مصر، فمتوقع يتحرك على حسب البورصة العالمية،زيعني لو الدهب عالميا طل، فسعر الجرام في مصر غالبا هيرتفع،
خاصة مع عودة الشراء بكثافة.
بس خلي بالك، احنا حاليا قدام تجربة مش مسبوقة، وكل السيناريوهات واردة، يعني ممكن يحصل تحول مفاجئ، خاصة لو تم توقيع اتفاقيات تجارة في اللحظات الأخيرة.
والخلاصة، هي إن يوم الأربع الجاي 9 يوليو، هو يوم مفصلي، لو ترامب نفذ تهديداته فالدهب هيكسب، ولو تم توقيع اتفاقيات فالدولار ممكن يرجع يقوى تاني، عشات كده، لو ناوي تشتري دهب أو تبيع دولار، تابع الأسواق كويس، ومتنساش تاخد القرار الصح في الوقت الصح، عشان ده اللي بتكسبك.
