فكر استراتيجي.. سر توقيت افتتاح المتحف المصري الكبير
كل العالم منتظر القرار الاهم حاليا وهو افتتاح المتحف المصري الكبير واللي هيكون واحد من اهم وأكبر المتاحف علي مستوي العالم.. إيه حكاية المتحف ده وايه تاثيره علي السياحة المصرية
من فترة طويلة ومصر أعلنت عن تشييد وبناء واحد من اكبر المتاحف علي مستوي العالم، وهو المتحف المصري الكبير واللي موجود في ميدان الرماية بمحافظة الجيزة، والمتحف ده هيكون فريد من نوعه وحاجات كتيرة هتكون مفاجأة العرض زي مراكب الشمس، وده غير أن المتحف مربوط بكوبري علوي مع منطقة الأهرامات يعني السايح ممكن بعد ما يخلص جولة المتحف يطلع علي الاهرامات أو العكس.
طيب هل تم تحديد معاد لافتتاح المتحف المصري الكبير؟.
الدكتور مصطفي مدبولي أعلن عن افتتاح المتحف المصري الكبير بشكل تجريبي يوم الاربعاء اللي جاي، وتجريبي دي علشان المتحف لسه في مرحلة اختبار الأجهزة.
الإفتتاح التجريبي اللي اعلن عنه رئيس مجلس الوزراء للمتحف المصري الكبير مش هيكون بشكل كامل وهيكون ناقصة حاجة مهمة قوي وهي قاعة الملك الذهبي توت عنخ آمون واللي مش هتكون متاحة للعرض، ودي اللي هتكون مفاجاة الافتتاح الكامل للافتتاح الرسمي اللي هتعمله الدولة واللي هيفتتحه هو الرئيس عبدالفتاح السيسي وهيكون أول واحد يدخل قاعة توت عنخ آمون واللي هتضم المجموعة الكاملة للملك الذهبي توت عنخ أمون بشكل كامل واللي بتوصل عددها لـ 5300 قطعة آثرية مختلفة وهتعرض مع بعض لأول مرة بشكل كامل في قاعة واحدة من وقت اكتشافهم سنة 1922.
طيب ليه مصر اختارت الوقت ده بالذات علشان تعلن عن الافتتاح التجريبي للمتحف المصري الكبير ؟.
احنا حاليا داخلين علي الموسم السياحي الشتوي،وده اللي هيكون في اقبال كبير جدا علي مصر من السائحين من كل دول العالم خصوصا قارة اوروبا واللي الاجواء بتكون فيها سقعة جدا، والناس هناك بيحبوا يخرجوا يقضوا فترات الاجازات واعياد راس السنة الكريسماس في اي دول برا، وطبعا كمفيش احسن من مصر خصوصا انها بتكون دافية جدا في الشتاء ومعتدلة في الصيف، ومصر في السنة دي بتستهدف الوصول لـ15.2 مليون سائح علشان تكسر الرقم القياسي اللي حققته في السنة اللي فاتت واللي وصل لـ14.9 مليون سائح.
