استثمار من العيار التقيل.. اللي متعرفعوش عن مشروع رأس الحكمة

يا ترى تطورات مشروع رأس الحكمة وصلت لفين، ايه اللي حصل بالظبط في المنطقة دي من ساعة ما الحكومة وقعت اتفاقية مع دولة الإمارات العربية الشقيقة لاستثمارها، وهي ناوية على إيه دلوقتي، وإيه هي المكاسب الأولية لمصر من الصفقة دي.. هنقولك كل التفاصيل في الفيديو ده فتابعنا للآخر. 
 

منطقة رأس الحكمة الموجود في الساحل الشمالي، أخدت ضجة كبيرة جدا خلال الفترة الأخيرة، خاصة بعد موافقة مصر على الطلب الإماراتي لاستثمارها.

وطبعا رأس الحكمة، بتتمتع بكتير من المميزات السياحية، أولها إنها من المناطق الاستراتيجية المهمة اللي لم تُستغل بشكل كافي رغم انها بتمتلك إمكانيات تنموية متنوعة وشاملة، كمان بتتميز بمقومات فريدة بتساهم في تنميتها بشكل كبير.

ويوم الجمعة اللي فات، الرئيس عبدالفتاح السيسي، والشيخ محمد بن زايد آل نهيان رئيس دولة الإمارات ، شهدوا إطلاق مشروع رأس الحكمة التنموي، بحضور الدكتور مصطفى مدبولي، رئيس مجلس الوزراء، بالإضافة إلى عدد من كبار رجال الأعمال من الجانبين المصري والإماراتي.

وبعد إطلاق المشروع بشكل رسمي، هنقولك بالأرقام إيه هي مكاسب مصر من "رأس الحكمة.

أول حاجة إنه هيتم تطوير مدينة ساحلية كبرى بمساحة 170 مليون متر، وكمان اللستثمار  المباشر فيها بتوصل قيمته ل35 مليار دولار وده بالتأكيد بيصب في صالح الاقتصاد المصري.

ووصلت الدفعة الأولى من الصفقة بقيمة 15 مليار دولار، والدفعة الثانية بقيمة 20 مليار دولار، وده بالتالي عمل حالة من الانتعاش الاقتصادي واللي انعكست بالايجاب على المواطن المصري، وحصل ثبات أو انخفاض لأسعار بعض السلع، بالإضافة لمميزات تانية زي توافر أغلب السلع  ثفي السوق بعد ما كانت محبوسة في المواني بسبب ان مفيش فلوس للإفراج عنها.

ضيف على كل ده، إن مشروع رأس الحكمة هيستقطب 8 مليون سائح إضافي كل سنة، وبالتالي هتنعش السياحة، وكمان هيتم إنشاء مطار دولي جديد فيها بالتعاون مع شركة أبوظبي الإماراتية.

بجانب كل ده، شواطئ رأس الحكمة بتمتد من منطقة الضبعة إلى مدينة مطروح، والمدينة نفسها بتستوعب 300 ألف نسمة، وهتجذب 3 مليون سائح إضافي كل سنة عند اكتمالها.

ولو ماتعرفش، فراس الحكمة هتشهد كمان إنشاء طريق فوكا الجديد اللي هيقلل المسافة بين القاهرة والساحل الشمالي، وبالتالي هيسهل السفر والسياحة لها.

عشان كده، نقدر نقول إن مشروع رأس الحكمة التنموي، هو استثمار من العيار التقيل جدا، ورسالة بتثبت للعالم كله إن المستثمر الأجنبي والعربي عنده ثقة كبيرة في الاقتصاد المصري.

ده غير إنه بيوفر فرص عمل كتيرة وهيساهم في علاج مشكلة البطالة، بالإضافة إلى أنه مشروع متنوع، اقتصادي وسياحي وعقاري، ومحل جذب لاستثمارات عالمية أخرى، وبيتمتع بالأمن والأمان وده محفز كبير للاقتصاد المصري.

كمان، مشروع رأس الحكمة هو مشروع تنموي متكامل، وبيتمتع بكم هائل من الاستثمارات بواقع 35 مليار دولار، بالإضافة للي هيضخه في توسعات جاية في نقس المشروع، وده دليل كبير وقاطع على أنه من المشروعات السياحية اللي هتخلق مزيد من الجذب السياحي لمصر.