وزير البترول يفتح الملف الشائك.. هيعمل إيه عشان يزود إنتاجية الغاز والزيت الخام؟

ايه هو الملف الشائك اللي فتحه وزير البترول خلال الساعات الأخيرة، هل هو مرتبط بحقل غاز جديد أو كشف بترولي، ولا استثمارات جديدة جاية في السكة وبتقابلها مشاكل، هنقولك كل التفاصيل في التقرير  ده. 
 

المهندس كريم بدوى وزير البترول والثروة المعدنية، أعاد فتح ملف صناعة البتروكيماويات، واللي هي بتعتبر جزء حيوي ومهم جدا للاقتصاد المصرى، لأن القطاع ده مرتبط بشكل وثيق بتعميق الصناعة المحلية وتقليل الاستيراد بالعملة الصعبة، ومش بس كده لأ ده كمان متعلق باستخدامات الحياة اليومية للمواطنين، لأنه مصدر أساسي لإنتاج الخامات والمنتجات اللي بتدخل في مختلف الصناعات وبينتج عنها مئات المنتجات اللي بيستخدمها المواطن في حياته اليومية.

ومن هنا، أكد وزير البترول، أهمية اللي بتعمله الوزارة حالياً من جهود لتحفيز الاستثمار في زيادة إنتاج الزيت الخام والغاز، عشان كل ده بينعكس على تحقيق الاستفادة المثلى من الطاقات المتاحة لمصانع إنتاج البتروكيماويات، باعتبارها صناعة تحويلية للبترول والغاز، واللي بالتالي هتشجع على جذب الاستثمارات الجديدة لها، وبعد كده المساهمة في رفع مستوى العائدات الاقتصادية المتحققة منها.

كل ده معناه حاجة واحدة بس، وهي إن الوزير بيعطي أولوية لصناعة البتروكيماويات، لكنه شدد في نفس الوقت على ضرورة الالتزام بالسلامة والصحة المهنية في مختلف مواقع صناعة البتروكيماويات، والمتابعة والمراجعة المستمرة، وكمان دعم هذه المنظومة بإجراءات متواصلة  للحفاظ على سلامة العنصر البشري، وكمان الجانب البيئي، والالتزام بأن تكون صناعة البتروكيماويات صديقة للبيئة، وكل مشروعاتها لها مردود إيجابي.

عشان كده، بدوي أكد على تنفيذ حزمة من المشروعات الإنتاجية الجديدة لصناعة البتروكيماويات، واللي هتكون لها انعكاس كبير على خفض الاستيراد من العديد من المنتجات وتحقيق مردود بيئى متميز، واللي هيتم الانتهاء منها تباعاً خلال السنوات القادمة، وأولى المشروعات دي، هو مشروع إنتاج الألواح الخشبية من قش الأرز بمدينة ادكو، لأن المشروع ده دخل مرحلة التشغيل التجريبي، وبيستعد للتشغيل التجاري السنة دي.

كمان من أهم المشروعات، هو مشروع وقود الطائرات المستدام والتوسعات الإنتاجية بشركة موبكو ومشروعها لاستخلاص ثانى أكسيد الكربون، واللي بيمثل نموذج للمشروعات البتروكيماوية صديقة البيئة، وغيرها من المشروعات اللي بتعزز القيمة المضافة والبعد البيئي والإنتاج الأخضر .

ومن هنا نقدر نقول، إن في توسع في برامج تعزيز كفاءة استخدام الطاقة في صناعة البتروكيماويات، عشان يساهم في الحفاظ على الطاقة وتحقيق الوفر اللي احنا محتاجينه، عشان يكون قطاع البترول مثال يحتذى به لباقى القطاعات، ويقدر يجذب الاستثمارات الجديدة في قطاع البتروكيماويات.

ولو حضرتك ماتعرفش، فإجمالي انتاج مصانع وشركات البتروكيماويات البالغ عددها 9 شركات قائمة ومنتجة، وصل في العام المالي 2023-2024، لحوالي 4 مليون طن بخلاف المنتجات الوسيطة اللي بتدخل في تصنيع البتروكيماويات في شركات تانية، وكمان تم تحقيق الخطة الإنتاجية بنسبة 105%، عشان توصل القيمة الإجمالية للمبيعات من المنتجات البتروكيماوية خلال السنة ما يناهز 37 مليار جنيه جنيه للسوق المحلي والتصدير كمان في وقت واحد.

وكل الأسباب دي كانت دوافع وزير البترول لتأكيد اهتمامه بصناعة البتروكيماويات.