سر تراجع ديون مصر.. وعلاقة بانتعاش حياة المواطن البسيط

يا ترى إيه سر تراجع ديون مصر خلال الفترة الأخيرة، وليه المرة دي بيعتبر التراجع الأكبر حجما، وهل ده له علاقة بانتعاش الاقتصاد المصري أو انعكاس إيجابي على حياة المواطن البسيط.. هنقولك كل التفاصيل في الفيديو ده 
 

خلال الفترة الأخيرة، أعلنت الحكومة المصرية، عن تراجع الدين الخارجي لمصر إلى 153.86 مليار دولار بنهاية مايو 2024 مقابل 168.03 مليار دولار أمريكي بنهاية ديسمبر 2023.

التراجع ده بيقدر بانخفاض بقيمة 14.17 مليار دولار بنسبة 8.43%، واتصنف بأنه الأكبر حجما في تاريخ المديونية الخارجية لمصر.

وفي الوقت اللي تراجع فيه الدين الخارجي وسداد مصر لالتزاماتها الدولية، ارتفع صافي الاحتياطات الأجنبية إلى 46.38 مليار دولار في يونيو 2024، وده مؤشر إيجابي جدا للاقتصاد المصري، وبيديه نوع من الانتعاش.

طب يا ترى إيه سبب تراجع الدين الخارجي لمصر.. بص يا سيدي في عدد من الأسباب، أهمها الإجراءات الإصلاحية اللي اتخذتها الدولة، خاصة بعد صفقة مشروع تطوير رأس الحكمة ودخول حصيلة كبيرة من النقد الأجنبي، تبعها قرارات البنك المركزي بوضع سعر عادل لصرف الدولار في مارس الماضي، ثم استقرار سعر الصرف والذي أدى للقضاء على السوق السوداء للعملة ووجود سعر واحد للعملة الأجنبية.

كل ده ساهم في زيادة تنازل الحائزين عن الدولار للبنوك الرسمية، إضافة لعودة تحويلات المصريين العاملين بالخارج إلى طبيعتها فزادت بنسبة كبيرة، بجانب زيادة دخول الاستثمارات الأجنبية المباشرة وغير المباشرة لمصر.. وبكده كل ده ساهم في زيادة الاحتياطي النقدي لمصر من العملة الأجنبية، وسداد الديون الخارجية على مصر.

ونقدر نقول كمان إن زيادة احتياطي مصر من النقد الأجنبي، وتراجع الدين الخارجي، بيعطي رسالة للمؤسسات الدولية أن الاقتصاد المصري قوي وقادر على التصدي للأزمات وأن الدولة قادرة على سداد التزاماتها الخارجية، وده بيؤكد قوة الاقتصاد المصري، وبيساهم في تقليل معدل التضخم يعني انخفاض الأسعار، واللي بالتالي هتبسط المواطن البسيط.

كمان كل ده بيعمل على تحسين تصنيف مصر الائتماني أمام المؤسسات الدولية، وده بيسهم في زيادة حصيلة مصر الدولارية عن طريق السندات الدولارية، كمان ده هيرفع التصنيف الائتماني لمصر ويخفض عجز الموازنة العامة للدولة نتيجة تراجع تكلفة الديون.

ضيف على كل ده، أنه بيعتبر مؤشر إيجابي للاستثمار الأجنبي، وممكن الفترة الجاية تشهد تحسن كبير جدا للاقتصاد المصري وزيادة في معدلات النمو.. وكل ده بالتأكيد يحسن الحياة العامة ويعود على كل مواطن بمزايا كتير واللي أبرزها خفص الأسعار.