إيه علاقة رفع أسعار البنزين باللي هيحصل يوم 29 يوليو؟
يا ترى ايه علاقة رفع اسعار البنزين والسولار باللى هيحصل يوم 29 يوليو ؟ وليه الحكومة سرعت بقرار الزيادة قبل يوم الاتنين الجاي؟ وايه الخدمات التانية اللى ممكن أسعارها تزيد الفترة الجاية؟ وامتى متوقع يتم رفع الدعم بشكل نهائي عن المحروقات والكهربا؟
من ساعات اتفاجيء ملايين المصريين بقرار وزارة البترول والثروة المعدنيةب رفع أسعار الوقود ليشمل البنزين والسولار بنسب زيادة وصلت الى 15%
ووفقا للقرار تم رفع بيع بنزين 80 من 11 جنيه إلى 12.25 جنيه وبنزين 92: من 12.5 جنيه إلى 13.75 جنيه.. وبنزين 95: من 13.5 جنيه إلى 15 جنيه.. والسولار من 10 جنيهات إلى 11.50 جنيه
وتم تحديد سعر بيع اللتر من الكيروسين بالمواصفات العادية تسليم المستهلك بسعر 11.50 جنيها شامل الضريبة على القيمة المضافة
طب ايه علاقة رفع اسعار البنزين باللى هيحصل يوم 29 يوليو؟
بص يا سيدي يوم الاتنين الجاي هيعقد المجلس التنفيذي لصندوق النقد الدولى واحد من اجتماعاته الدورية لمناقشة برامج الاصلاح الاقتصادي فى عدد من الدول ومن بينهم مصر وبناء على الاجتماع دهع الصندوق هينظر فى البرنامج وهيشوف هل الحكومة نفذت الشروط المتفق عليها مع الصندوق ولا لأ ومن بين الشروط دي طبعا رفع الدعم عن أسعار الوقود والكهرباء وغيرها من الشروط اللى الحكومة المصرية تهدت بتنفيذها
وفى خطوة استباقية من الحكومة قررت رفع اسعار المواد البترولية عشان تقدر تمرر المراجعة التالتة وتصرف شريحة جديدة من قرض ال 8 مليار دولار بقيمة 850 مليون جنيه وفيه كمان خطوات تانية وتحريك جديد فى اسعار الكهربا واسعار السلع التموينية ممكن ميحصلش الايام دي لكن التحريك ده جاى جاي
طب ايه موقف الحكومة وازاى بتفكر فى الملف ده ؟
رئيس الوزراء مصطفى مدبولي قال من ايام إن أسعار المنتجات البترولية هترتفع تدريجيا حتى ديسمبر2025، وقال أن الحكومة لا تستطيع أن تتحمل تكلفة الدعم الزائد إلى الأبد حتى يتم توزيع الدعم بشكل مناسب.
ةسبق أن رفعت مصر أسعار جميع فئات البنزين جنيهً واحد في شهر مارس اللى فات عقب قرار تحرير سعر الصرف، وزاد سعر السولار بنسبة 21%، وأسطوانات البوتاجاز بنسبة 33%، لكنها أبقت على أسعار بيع المازوت للصناعات الغذائية وشركات إنتاج الكهرباء والطاقة من دون تغيير.
ورفعت لجنة التسعير التلقائي للمنتجات البترولية سعر البنزين مرتين خلال السنة اللى فاتت كان آخرهم في نوفمبر بهدف تقليل الفجوة السعرية بين تكلفة توفير البنزين وسعر بيعه فى السوق المحلية. وأبقت على سعر السولار من دون تغيير من مايو2023 لما له من تأثير في وسائل نقل الركاب والبضائع.
