نبوءة الدهب بتتحقق .. إلحق اشتري قبل فوات الآوان

 
ليه بنقولك إلحق اشتري دهب دلوقتي وقبل الفرصة ماتروح وياترى الأسعار رايحة على فين الايام الجاية وايه هي أفضل طريقة تستثمر فيها في الدهب.. تعالي هنقولك كل التفاصيل 
 
سوق الدهب مش محتاج كلام وكلنا شايفين الأسعار بتزيد ازاي فيه كل يوم والنهاردة عيار 21 سجل 3175 جنيه  عشان يسجل ارتفاع  بنسبة 1.4%، بقيمة 45 جنيه للجرام في شهر يونيو اللي فات بس يعني الدهب زاد حوالي 50 جنيه وده مش كلامنا ده اللي قاله تقرير جولد بيليون للذهب وطبعا ده بينطبق على كل الأعيرة التانية.
طيب يعني الدهب رايح على فين في الصاغة ؟
شوف ياسيدي زي ماقلنا قبل كده الدهب سوق بيتحكم فيه عوامل كتير جدا لكن الأساس في تحديد الاسعار عندنا هو سعر صرف الدولار وارتباطه بالاسعار العالمية وحجم العرض والطلب وطبعا لو الدهب زاد بشكل مبالغ فيه هتحصل مشكلة كبيرة في الطلب وركود في الصاغة ومش هيشتري غير القادر اللي عنده سيولة متوفرة لكن في الأصل السعر العالمي هو اللي بيحدد أسعار المعدن الأصفر في أغلب بلاد العالم عشان زي ماقلنا السعر ده بيكون ليه علاقة بالدولار لانه ببساطه الدهب بيتسعر بالدولار.

وعلشان نعرف أسعار الدهب عندنا رايحة على فين الفترة الجاية يبقي لازم نعرف السوق العالمي رايح على فين وايه احدث التوقعات.. شوف حضرتك للاسف كل التقارير والارقام بتقول إن الدهب خد قوة دفع كبيرة للصعود ومثلا اسعار الدهب العالمية زادت بنسبة 12.8% منذ بداية 2024 وطبعاً دي نسبة كبيرة جدا في 6 شهور وسجل سعر أونصة الدهب العالمي ارتفاعا عند أعلى مستوى وسجلت 2329 دولارا وحسب أحدث التوقعات الطويلة المدى سعر الدهب هيوصل إلى مستوى الـ 2,627 دولار بنهاية سنة 2025، ثم إلى مستوى الـ 2,676 دولار بنهاية سنة  2026. وهيرتفع الدهب لأعلى مستوى الـ 3,000 دولار في سنة 2027، ومستوى الـ 4,500 دولار في عام 2030، ومستوى الـ 5,200 دولار في عام 2033 ودي أحد أكتر التوقعات صعودا لأسعار المعدن الأصفر وعادة بسعر الذهب بيرفع خلال فترات عدم استقرار السوق وارتفاع الطلب على المعادن الثمينة والصراعات الدولية.

كمان أظهرت نتائج إحصائية لمجلس الذهب العالمي بشكل سنوي استطلع خلالها آراء 70 من محافظي البنوك المركزية، أن 29% منهم بيخططوا لزيادة احتياطاتهم من الدهب خلال الشهور الجاية وده معناه زيادة كبيرة وقياسية في الطلب على الدهب عالميا في وقت المعروض بيتآكل في الأسواق العالمية وطبعا حضرتك ممكن تتخيل الأسعار هتزيد ازاي في وضع زي ده وعلى فكرة لسه كمان لما بنك الاحتياطي الفيدرالي الأمريكي يخفض الفايدة الطلب على الدهب هيبقي بالحجز ف بالاسواق العالمية وسعره اكيد هيقفز تاني.

وبالنسبة لسوق الدهب المصري زي ماقلنا لحضرتك إنه مرتبط بشكل أساسي بالسوق العالمي والدولار ولأن مصر بتستورد دهب كتير تقدر تتخيل الدهب رايح على فين لو ضربت الأرقام اللي قلنا عليها بالدولار بنا تساويه من الجنيه المصري يعني بتتكلم في ارقام فوق ال7 آلاف جنيه للجرام 24 وفي سنين قليلة عشان كده الدهب استثمار طويل الأجل مش اقل من 3 أو 5 سنين عشان تكسب وعشان كده الحق أشتري دلوقتي قبل فوات الآوان والافضل طبعا انك تشتري سبايك وجنيهات دهب ولو عندك اصول مش محتاجة أو قيمتها في الاستثمار بتقل يبقي بيعها واشتري اللي هيكسبك ثروة في مدة قليلة.
كمان خلي بالك من حاجة تانية خالص وهي إن توقعات كتير بتقول إن البنك المركزي المصري هيخفض الفايدة الاجتماعات الجاية بسبب انخفاض التضخم واكيد البنوك مش هتطرح شهادات ادخار عالية الفايدة يعني بوصلة الاستثمار هتتنقل من الشهادات لسوق الدهب ودي شريحة تانية بتدخل الصاغة وطبعا هيكون ليها تأثير مضاعف على الطلب والاسعار.