السيسي ناوي على إيه.. إيه حكاية المخازن الضخمة اللي بتتعمل في البلد
ايه حكاية المخازن العملاقة اللي بتعملها الدولة اليومين دول وياترى السيسي ناوي على ايه في الأيام الجاية واشمعنا التوقيت ده بالذات .. تفاصيل كتير هنعرفها مع بعض في الفيديو اللي قدام حضراتكم.
لو متابعين فيه خبر عدى علينا كلنا ومحدش خد باله منه اليومين اللي فاتوا لكن معناه كبير جدا ويعرفنا قد إيه الرئيس السيسي بيفكر ببعد نظر وقبل غيره بسنين وبيشوف الخطر من بعيد وهو بناء مخازن ضخمة استراتيجية للأدوية والمستلزمات الطبية.. طيب إيه حكاية المخازن دي وليه الدولة بتصرف عليها 8 آلاف مليون جنيه أو 8 مليار جنيه،..
شوف حضرتك دلوقتي الحكومة شغالة في إنشاء 6 مخازن استراتيجية للأدوية والمستلزمات الطبية، وهيتم الانتهاء منها في السنة الجاية 2025، باستثمارات 8 مليار جنيه زي ما قلنا ودي هتكون بهدف تأمين الأمن القومي من الأدوية والمستلزمات الطبية والتحكم في منظومة من اخطر المنظومات اللي ممكن تمس حياة الشعوب وكلنا شفنا اللي حصل في جائحة كورونا والبلاد اللي ضاعت عشان مكنش عندها مخزون من الأدوية واللي متقلقش في أهميتها عن مخزون القمح والزيت والسكر لأنها تتعلق بحياة الناس.
مصر فكرت تعمل مخازن استراتيجية ضخمة وتقدر تتخيل حجم المخازن دي من قيمة التكلفة الضخمة عشان ماتكون تحت رحمة شركات الأدوية العالمية في أوقات الأزمات ولا تقعد تدور على لقاحات أو عقاقير في وقت الأوبئة ومصر من الأخر بتبني احتياطيات ضخمة الأدوية زي احتياطات الغاز والبترول والنقد الأجنبي اللي في البنك المركزي.
والمخازن دي بيملكها شركة المخازن الاستراتيجية، التابعة للهيئة المصرية للشراء الموحد، وصندوق مصر السيادي، وجهاز مشروعات أراضي القوات المسلحة وبتتوزع أماكن المستودعات في 6 محافظات هي، القاهرة، والإسكندرية، والدقهلية، وقنا، والمنيا، والإسماعيلية.
طيب فيه أسباب تانية اقتصادية غير اللي الأسباب الاستراتيجية اللي قلنا عليها.. أيوا طبعا وده لأن سوق الدواء المصرية عاني كتير من نقص في بعض الأصناف وزيادات متتالية في الأسعار خلال السنين اللي فاتت بسبب نقص المواد الخام اللازمة للإنتاج أو تكدسها بالموانئ لعدم وجود السيولة الدولارية المطلوبة للإفراج عن البضائع وقتها وده مثل خطر كبير جدا على قطاع الصحة في مصر واللي بيتعلق زي ماقلنا بحياة الناس والمرضى وامدادت المستشفيات ومصر دولة فيها صناعة أدوية قوية لكن دا مايمنعش يكون عندها مخازن استراتيجية ورصيد كبير من الأدوية يضمن عدم حدوث أزمة من جهة ومن الناحية التانية تعمل توازن في الأسعار لو حصلت أزمة عملة زي اللي شفناها في السنة اللي فاتت..
المشروع بيحظي باهتمام ومتابعة خاصة من الرئيس السيسي حسب المعلومات اللي حصلت عليها بانكير لأنه مشروع بيمثل تأمين مهم للشعب المصري.
